SEMRA TURAN
MA / DÊRSIM
Bajarê Dêrsimî ke wextê Osmanîyan ra nata nasnameyê xo yê kurdî û elewîtîye ver raştê xeylê hêriş û qirkerdişan ameyo, roja ma ewroyî de zî bi şewatanê daristanan rojeve de yo. Şewatî hetê dewlete ra yenî vetene û destûr nêdîyena ke şar şewatan hewna bikero.
Babete ser o şaîr û nuştoxo dêrsimij Fadil Ozturko ke Îzmîr ra agêrayo memleketê xo, qisey kerd û reaksîyon nîşan da. Ozturkî va ‘wazenî bi şewatan herême bêmerdim bikerî’ û wina domna: “Na rewşe rewşa şerê mîyanênî yê mabênê serranê 1946 û 49î yê Yewnanîstanî manena. Yewnanîstanî o wext seba ke komunîstan tena biverdo, tayê herêman bêmerdim kerd. Dêrsim de zî eynî çî yeno kerdene.”
Ozturkî va ‘Dêrsim de mezelê adirinî yenî kinitene’ û wina dewam kerd: “Dewlete wexto ke nînan kena, qet şerm nêkena û çimanê heme dinya ver de nêyî kena. Çi heyf o ke ma zî sey çîyê normalî vînenî. Prosesê çareserîye ke vizêr estbi, ewro bîyo prosesê çinkerdişî. Hêzê mîyanneteweyî bi destê AKPyî heyfê serewedarnayîşê kurdan gênî. Çîyê ke zorê merdimî beno o yo ke ma tehamulê dewlete kenî, labelê ma tehamulê yewbînan nêkenî.
Şaîr û nuştox Fadil Ozturk kam o?
Şaîr û nuştox Fadil Ozturk 1955 de Dêrsim de ameyo dinya. Serra 1980î de bi Doza Dev-Yolî ra ameyo mehkeme kerdene û cezaya muebedî girewta. Ozturk pêro pîya 10 serrî zîndan de mendo. 3 kitabê ci yê şîîran estî û tayê şîîrê ci zî kovaranê Kunduz Duşlerî û Utopya de weşanîyayî. Ozturk hîna zî Merkezê Cigêrayîşanê Dêrsimî de xebatanê xo domneno û keyepelê Arti Gerçekî de kuncnuştoxîye keno.
