Tembûr nasnameyê komelkî yê elewîtî yo

SEMRA TURAN / MA / DÊRSIM

Bawerîya elewîtîye de cayê tembûrî (saz) zaf muhîm o û nêzanbo bêro ciniyane zî her keye de tesilî aliqnaye yo. Çimkî deyîşê elewîtîye bi tembûrî yenî vatene. Babete ser o Pîr Zeynel Keteyî derheqê muhîmîya tembûrî de qisey kerd û melumatê muhîmî dayî.

Keteyî dîyar kerd ke Dêrsim cografyaya Reya Haqî yo û rastê qirkerdişê netewdewletan ameya û wina va: “Erjê madî û manewî yê elewîyan roja ma ya ewroyî de her ke şono vinî benî. Elewîyî verê cû nameyê tembûrî bikar ardêne, dima ra bajaran de bica bîyayîşî ra dima nameyê baglama ame bikar ardêne û tembûr ame vîrî kerdene.”

Keteyî dewamê qiseykerdişê xo de wina va: “Muzîk cuye reyde eleqeder o û elewîtîye de merdim muzîkî reyde nizdîyê Heqî beno. Tembûr eynî wextî de şeklêkê rexistinbîyayîşî yo. Tembûr dejê elewîyan neqlê neslanê bînan keno. Cok ra tembûr şahidê her wextî yo. Ma tarîxê xo bi tembûrî anî ziwan. Tembûr vera zulmê zaliman de haletê propoganda yo û xoverdayîş, bawerî, têkoşîn û vindetişê polîtîkî yê elewîyan dîyar keno. Heme xusûsîyetê elewîtîye tembûr de yenî pêser. Tembûr nasnameyê komelkî yê elewîyan o. Tembûr bi hawayo tîk yeno aliqnayene û no vindetişê înan nîşan dano. Rîyê ci sîya yo. Manaya ci zî o yo ke elewîyî vera şer, surgun, qetlîyam û sewbîna de şîn de yî. Piskila ci zî sûre ya û aye zî yena manaya qizilbaşîye.”