Teşebusê derbe ra dima OHAL ame îlankerdiş û îlankerdişê OHALî ra dima zîndanan de hepsîyan ser de zext û tedayî zêde bîyî. Goreyê daneyê Komeleya Heqê Merdiman (ÎHD) nika 400ê ci giran 905 hepsîyê nêweşî zîndananê Kurdistan û Tirkîya de estî û roje çin a ke xebera neheqîya heqê cuyayîşî nêra.
Babete ser o aktîvîstê heqê merdiman qisey kerdî.
Îdarekarê ÎHDyî yê Şûbeya Îzmîrî Ahmet Çîçekî va ‘teşebusê derbe ra dima zîndanan de îxlalê heqan zêde bîyî’ û wina domna: “Seba ke şert û mercê zîndanan zaf hepsîyî nêweş kewtî. Odeyanê 3 kesan de 18-19 kesî, odeyanê 7 kesan de 25 kesî manenî. Zîndanan de xeylê hepsîyê nêweşî estî û polîtîkayêka dewlete ya seba başkerdişê hepsîyan zî çin a. Seba ke Dezgeyê Tibê Edlî (ATK) zaf hêdî xebetîyeno, hepsîyo ke nêweş o, nêweşîya ey hîna zaf giran bena. Ganî raporê ke nêweşxaneyanê taybetinan ra yenî girewtiş zî bêrî hesibîyayîş. Mesela zamayê Serekê Şaredarîya Bajarê Girdî yê Stenbolî Kadîr Topbaşî Omer Faruk Kavurmaciyî nêweşîya xo ver, ame tehlîyekerdiş, ganî no seba heme hepsîyanê nêweşan bibo nimûne. Ganî huqûq seba her kesî seyyewbînan bibo.”
Ganî hepsîyê nêweşî tedawî bivînê
Verfeka Însîyatîfê Piştîdayîşê Zîndanan Selma Altane zî qiseykerdişê xo de bale ante rewşa Ergîn Aktaşo ke 2 polî ey çin î û nika Zîndanê Menemenî de maneno ser û wina va: “Seba ke 2 polê eyî çin î, nêşêno xo bişiwo. Cok ra bedenê ci de mantar vejîyayo. Ganî Aktaş bi hawayo lez serbest bêro veradayîş. Reyna hepsîyo bi nameyê Ahmedî Hamîyo ke felc o, esto. Ma zanî ke eke tedavîya ci bêra kerdiş, baş beno. Cok ra ganî demêko rewêr bêro tedavîkerdiş. Hepsîyo bi nameyê Yusuf Bulut zî 68 serreyî yo û nêweş o. Tena sereyê xo nêşêno çîyêk bikero. Ganî heme hepsîyê nêweşî zîndan de nê, nêweşxane de tedavî bivînî. Waştişê ma no yo, nika zîndanan de huqûqê dişmenî esto.”
DÎHABER/ÎZMÎR