Welatanê Ewropa de nûmayişê protestokerdişê Komployê Mîyanneteweyî yê vera Rayverê Şarê Kurd Abdullah Ocalanî virazîya ramenê. Kurdistanijî û dostê ci Almanya û Luksembûrg ra bi slogana “Ocalanî rê Azadî Kurdistanî rê Statu” di hetan ra vera Strasbûrg rayîr şinê.
Rayşîyayişa derg ya ke 1ê Sibate de Luksembûrg de destpa kerd û bi desan dostê kurd yê ke welatanê zey Şîlî, Ûrûgûay, Arjantîn, Îspanya, Portekîz, Bask, Danîmarka, Swîsre, Swêd, Îtalya, Brîtanya, Belçîka, Hollanda, Fransa û Almanya mîyan de ca gênê roja 9. de vera Strasbûrg ramena. Şewa verî nûmayişkarî resyay sûka Sarre-Ûnîon û tîya de derheqê konferalîzma demokratîk de semînerek virazîya. Seatanê şew de zî jû koma faşîst ya tirk çormeyê bana ke nûmayişkarî mîyan de bî girewtî û waştî hêrîş bikerê. Badê mudaxaleyê polîs û cendirmeyan hêrîşkarî na ca ra amey dûreştiş. Nûmayişkaran dormeyê 210 kîlometre ra vêşêr rayîr pey xo de ternay.
Nûmayişkarî kêfweş ê
Komîteyê Hadreyîn yê nûmayişî ra Songul Karabûlût qisey kerd û vist vîrî ke 19 welatanê cîya ra 70 nûmayişkaranê enternasyonalîst ra pîya 15 temsîlkarê sazgehanê kurd rayşîyayiş de ca gênê.
Karabûlût aşkere kerd ke rexmo ke lingê nûmayişkaran dejenê zî bi qerardarîyêka gird nûmayişa xo ramnenê. Songul Karabûlût herzewbîn da zonayen ke goreyê serranê verênî eleqeyêka gird yena damisnayiş û va, ’nûmayişkarî rîwalê na eleqe kêfweş ê. Rexmo ke ziwanê wertex Îngilîzkî yo zî, kesê ke ziwanê pê zanê bi pê ra qisey kenê.
Karabûlût tewr peynî de seba meş û mîtînga 11'ê Sibate ya Strasboûrg ke seba protestokerdişê Komployê Mîyanneteweyî virazîyeno vengdayîşê tewrbîyayîşî kerd û va: “Kurdistanijê ke Ewropa de cuyenê, zey her serr iyê dê emser zî dûştê komployî vinderdişeke zelal damûsnê.”
Baskê 'Azad Bike' nezdî beno
Baskê bîn yê rayşîyayişa derg 5ê Sibate de bi slogana 'Azad Bike' sûka Almanya Mannheîm de destpa kerd. Nûmayişa ke bi pêşengîya ciwanan de yena ramiten vizêr şan de resya sûka Rastatt.
Ciwanê ke şewa verî resyay sûka Karlsrûhe, Navendê Civaka Demokratîk ê Kurd de merasîmeke vîrardişê Mehmet Tûnç û pêro şehîdanê xorayverînan viraştî. Vizêr sodir zî ciwanî Marktplatz a Karlsrûhe de amey têlewe û bi Çerxa Şoreşê destpa nûmayişa xo kerdî. Nûmayişkarê ke vizêr qasê 30 kîlometre ray şî resyay sûka Rastatt.
‘Ma dê xo bipawê’
No mabên de faşîstanê tirk roja verî sûka Brûchsal de hêrîşê nûmayişkaran kerdî. Serçete Îbrahîm Şîmşek ke bi kardîya xo bi dirbetin wedarîya nêweşxane. Konsolosê Karlsruhe yê Tirkîye Cem Ornekol şi nêweşxane û hêrîşkar Şîmşekî zîyaret kerd. No zî damisneno ke no hêrîş bi konsolosxane û MÎTê Tirkîye ameyo organîze kerdiş.
Heto bîn ra ser keyepelê Facebook yê teşkîlatê AKP yê Ewropa UETD de dîmeneke ame weşînayiş. No dîmenî de komanê faşîst yê tirk aşkere kerdî ke iyê dê Rastatt de hêrîşê ciwananê kurd bikerê. UETD ke lobîya Elmanya yê rejîma AKP ramnena, bi hawayekî akerde hêrişan plan kena û venga şîdetî dana komanê faşîst. Vera nayî polîsanê Alman zî day zonayen ke hemverê hêrîşekê gengaz ra hadre yê.
Komîteya Hadreyîn yê nûmayişî hêrîşanê UETD protesto kerd û da zonayen ke, ciwanî dê bi xopawitişî cewab bidê hêrîşanê faşîstan.
NAVENDÊ XEBERAN