Dewa Komurcu ke girêdayeyê qezaya merkezî ya Nîgde ya de 40 serrî ra dima reya sifteyîne ya ke cem ame girewtene. Dewe de serra 1983î de camî ameyo viraştene û o wext ra nata qet cem nêamebi tepiştene.
Endamanê Ocaxê Kureyşanî ra Pîr Garîp Bozkurt bajarê Semsûr ra şi ewja û girewtişê cemî organîze kerd. Bozkurtî babete ser o qisey kerd û vera polîtîkayanê dewlete de reaksîyon nîşan da. Pîr Bozkurtî va ‘ma zaf baş zanî ke ewja de çira camî ameyo viraştene’ û wina dewam kerd: “Ma do seba ke erkanê elewîtîye bêro domnayene, vera nê polîtîkayan de têkoşîn bidî.”
Pîr Bozkurtî qiseykerdişê xo de wina va: “Ma înan ra zî va ke ma do nika ra pey rojanê xusûsîyan de şêrî û înan zîyaret bikerî. 40 serrî ra dima ma ewja de cem girewt, pîr û zakîrê ma deyîşî vatî. Canî cem girewtî û merdimî zaf kêfweş bîyî. Ez bawer kena ke na bawerîye do vînî nêbo. Çimkî ma qala bawerîya ke vera merdim û tebîetî de rêzdar a kenî. Seba dewamê cuyêka biheskerdişe, lazimîye bi nêyî esta. Cok ra ez bawer kena ke ma do serbikewî. Ganî pîrê ma wayîrê nê rayîrî bivejyî. Ma do şîyayîş û ameyîşê dewanê winasîyan bidomnî. Eke ma wina bikerî, o wext canê ewja do rayîrê xo bivînî û neqlê domananê xo zî bikerî.”
PÎRHA / SEMSÛR