Hetê Serekîya Dayîreyê Polîtîkayanê Cinîyan yê Şaredarîya Şaristanê Girdî yê Amedî ra, semedo ke mîyanê şaristanî de îstîhdamê cinîyan bêro zêdekerdiş, atolyeyê tekstîlî ameyî akerdiş û cinîyê ke atolyeyan de perwerde vînenê malzemeyê ke lazimtîya şaredarî ci ra esta derzenê.
Perwerdeyê deştişî ame dayen
16 cinîyê ke Taxa Baglarî Yenîkoy û Qezaya Hênîyî de 3 aşmîyo ke atolyeyanê tekstîlî de xebate kenê, qedîyayîşê perwerdeyî ra dima, dest bi deştişê kincanê xebatkaranê îtfaîya û newresîmanê Yurdê Wendekaran yê Kênayan kerd. Cinîyê ke atolyeyan de xebitîyenê tena karanê şaredarîyan nêkenê. Cinî, kargehanê mîyanê bajarî yê tabetan rê zî xebate kenê û nika destanê cinîyan de xeylê sîparîşî estî.
Mudira Xurtkerdişê Ekonomîya cinîyan ya Serekîya Dayîreyê Polîtîkayanê Cinîyan Fatma Esmere derheqê xebatanê atolyeyan de zanayîş da û wina va “Ma 3 aşmî verê cû atolyeyê tekstîlî akerdî. Atolyeyan de 10 hebî makîneyê deştişî estî. Atolyeya Yenîkoyî de 11 cinî, ya Hêniyî de zî 5 cinî xebitîyenê. Ma ewil bi perwerdekaran, perwerdeyê deştişî da cinîyan. Cinîyan dima ra zî dest bi xebate kerd û nika zanê çî-mîyan biderzî. Atolyeyan de sîparîşê şaredarî û yê kargehanê taybetan yenê girewtiş.
Qezenç bi hewayo seypê yeno parekerdiş
Esmere îzah kerd ke Atolyeyan de xebate bi hewayo kolektîf bena û qezencê xebate zî bi hewayêko seypê mîyanê cinîyan de yeno parekerdiş. Esmere wina va “Mudirîya Şaxa Xurtkerdişê Ekonomîya Cinîyan tena atolyeyî akerdî. Ma demê ronayîşê atolyeyan de cinîyan rê ardim kerd. Wexto ke cinî çî-mîyanê xo derzenê ma înan rê ardim kenê. Wexto ke karêkê şaredarî beno ma qismêkê ê karî danê înan. Eke ma sey nimune vaje, tîşort û kincê xebatkaranê îtfaîya hetê înan ra yenê deştiş. Onca taximê newresîmî yê ke semedê Yurdê Wendekaran yê Kênayan ra yenê hadrekerdiş zî hetê nê atolyeyan ra yenê deştiş. Mesele ana ya: 16 cinîyan bi kede û gurîyayîşê xo yew atolye awan kerde. Ma wazenê wa her kes destek bido na keda cinîyan.”
Hûmara atolyeyan yena zêdekerdiş
Esmere peynîya qalîkerdişê xo de da zanayîş ke ê do seba asîyayîşê keda cinîyan Cadeyê Sakaryayî de yew stand abikerê û wina va “Ma do sey nê xebatan, xebatanê xo bikerê zêde. Ma do mîyanê bajarî de hûmara atolyeyan bikerê zêde û qezayan de zî winasî cayan abikerê.”
AMED