Rayberê Şarê Kurd Abdullah Ocalan ke Girawa Îmrali de yeno tepiştiş ser de tecrîdo ke heta nika ti cayê dinya de nêameyo dîyayîş, esto. Ocalan 27ê Temmuza 2011î ra nata bi avûkatanê xo, 11ê êlula 2016î ra nata bi keyeyê xo û 2015 ra nata zî nêşêno bi Heyetê Îmrali reyde pêvînayîş bikero. 

Kurdî û dostê kurdan vera tecrîdî de Kurdistan, Tirkîya, Rojhelato Mîyanên û Ewropa de vindenî û seba weşî, ewleyî û azadîya Ocalanî çalakîyan virazenî. Babete ser o Hemverfeka HDKyî Gulistan Koçyîgîte û avûkat Mehdî Oztuzunî qisey kerdî. 

Koçyîgîte dîyar kerde ke Ocalanî babeta azadîya cinîye kerdo bingeyê paradîgmaya xo û wina va: “Herçiqas ke zaf partî û rêxistinî qala azadîya cinîye kerdî zî, tena Ocalanî vato ‘heta ke cinîye azad nêbo, komel zî azade nêbeno’. Seke yeno zanayîş Ocalan hertim vano ‘ganî ma cayo ke vînî kerdo ra dest pêbikerî’. Komelî ewil kolebîyayîşê cinîye de vînî kerd. Cok ra azadîya cinîye paradîgmaya Ocalanî de nuqtaya tewr muhîme de ya. Yanî eke cinîye azade nêba, çîyêk azade nêbeno. Heta cinîye azade nêba, sîstemêko azade zî nîno awankerdiş.”


Seba aştîye ganî ma vera tecrîdî de bivinderî

Koçyîgîte va ‘mabênê cinîye û aştîye de girêdayîyêk esto’ û wina domnaye: “Cinîye hertim vera şerî de ya û hetê aştîye de ya. No het de cinîye mîsyonêko gird seba Birêz Ocalanî dîyar kerdo. Çimkî Birêz Ocalan hertim qala aştîye keno û wayîrê projeya aştîye yo. Sîstemê tecrîdî û şertê azadîya Tirkîya girêdayeyê yewbînan î. Heta şertê weşî, ewleyî û azadîya Ocalanî pê nêrî, merdim nêşêno Tirkîya de qala aştî, demokrasî û azadîye bikero. Eke ma biwazî derheqê aştî û demokrasî de çekuyêk vajî, ganî ma vera sîstemê tecrîdî de bivinderî.”


Ocalan mîmarê pîyacuyayîşî yo

Avûkat Oztuzuno ke 2007 ra nata xeylê reyan Ocalanî reyde pêvînayîşî kerdî, va ‘Ocalan mîmarê pîyacuyayîşî yo’ û wina dewam kerd: “Saya Birêz Ocalanî de sosyalîzm raşt bî. Birêz Ocalan tena seba kurd û Tirkîya nê, seba Rojhelato Mîyanênî şansêk o. Eke ewro şarê ke Vakurê Kurdistanî de yî yewbînan reyde şer nêkenî, no saya fikrê Birêz Ocalanî de yo. Birêz Ocalanî pêvînayîşan de vatêne ‘ez temsîlkarê bindestan a’ û no vatiş mi ser de zaf tesîr kerd. Tecrîd tena Tirkîya reyde eleqeder nîyo. Çimkî tena rolê gardîyanî dîyayo Tirkîya. Tecrîd seba şekildayîşê Rojhelato Mîyanên zî yeno domnayîş. Çimkî Rojhelato Mîyanên de projeya neteweya demokratîke ya Ocalanî zaf muhîm a.” 


Ancax şarî eşkenî tecrîdî wedarnî

Oztuzunî dewamê qiseykerdişê xo de va ‘ancax şarî eşkenî tecrîdî wedarnî’ û wina domna: “Eke tecrîd wedarîyo do Tirkîya zî rehet bibo. Wexto ke tewr peynî birayê Ocalanî şîbî pêvînayîş, Ocalanî vatbî ‘Amerîka destûr dana ke Tirkîya bikewo Rojawan, hetta teşwîq kena. Do ewja de kurd û tirkan bido şerkerdiş. Hêzo hegemonîk destûr dano nêyî’.” 


NAVENDÊ XEBERAN