Bêrîtan Bongilanê Çewligî de amê dinya û mektebo sifteyînî Xarpêt de wende û seba ke unîversîte biwano, şîybî Stenbol. 

Berîtane birayê xo Servet Azmî Karataşo ke o wext mamostatîye keno, bi tesîrê ci tevgerê azadîye şinasnena û serra ewilî yê unîversîte de yena tewqîfkerdiş û raştê îşkenceyî yena. Berîtan senî ke heps ra vejena, verê xo dana koyan û pey xo de yew mektube verdena. Berîtan mektuba xo de vana ‘Ez çîyêk xo vîra nêkena û ez do hesabê hemînan bipersa.’ Berîtan serra 1992 de ‘operasyonê Sandvîçî’ ke artêşa tirk bi PDK û YNK ra pîya tewr benê, uca de heta guleyê xo yê peyên şer kena û dima ra seba ke nêkewo destê dişmenî xo kemeran ra erzena war.

Babete ser o Endama Grûba Aştîye Aysel Dogan û pîyê aye Mustafa Necatî Karataşî qisey kerdî.

‘Ê cinîyê ke bîyî şar û bîyî eşq, cinîyê winasî yî’

Endama Grûba Aştîye Aysel Dogan ard zon ke merdim nêşkeno qalê qehremanêka winasî bikero û wina va: “Yanî vatişî ra vîşêri ganî cinîyê winasî bêrî ciwîyayîş. Goreyê mi, ma hîna Bêrîtan fam nêkerdo. Bêrîtan Dêrsim a, Bêrîtan Kurdistan a, Bêrîtan eşq a. Bêrîtan heskerdiş a. Eslê xo de derheqê merdimîye de çiqas çîyê rindî estî se, ma eşkenî hemînan seba Bêrîtan vajî. Çimkî ê cinîyî bîyî şar û bîyî eşq, cinîyî winasî yî.” 

‘Bêrîtan eşq û rayîrê azadîye ya’

Aysel Dogan dewamê qiseykerdişê xo de va ‘Bêrîtan hende welat û şarê xo ra hes kerde ke no heskerdişî kerd eşqêk’ û wina domna: “Wexto ke Bêrîtan xo zinaran ra eşt war, o wext ganî ciwîyayîş senî bibo, o zî qîraye. Bêrîtan zîhnîyetê camêrdî rê cewabêk bîye. Famkerdişê Bêrîtan yeno manaya welatperwerîye, azadbîyayîş û cinîbîyayîşî. Cinîyê ke xo kerdî Bêrîtan, Rojawan de destan nuştî. O wext ma encax bi Bêrîtan bîyayene eşkenî deynê xo biderî. Ma Bêrîtan ra hes kenî, a eşq û rayîrê ma ya azadîye ya.”

Yew hemleya xoverdayîşî ya

Dogan hayr ant famkerdiş û îfadekerdişê Bêrîtan ser û va: “Ma çiqas fam bikerî, hende eşkenî qalê Bêrîtan bikerî. Bêrîtan eynî wextî de yew hemleya xoverdayîşî ya zî. Xoverdayîşêko neweyî. Bêrîtan yew toximêko neweyî ronaye. Ewro Başûr û Rojawan de bi hezaran cinîyî têkoşîn dayî û bîyî qehreman. Ma encax perçeyek Bêrîtan xo de bikirêşî, eşkenî aye bidî ciwîyayîş.” 


MUJDAT CAN / SERFIRAZ GEZGÎN /  DÎHA / DERSIM



‘Ma rayîrê Bêrîtan de yî’

Pîyê Bêrîtan Mustafa Necatî Karataşî zî behsa keynaya xo kerd û va Bêrîtan zaf jêhatî bîye û zaf muhakemeyê ciwîyayîşî kerdêne. Karataşî da zonayen ke tehemulê Bêrîtan seba neheqîye qet çinêbî û wina va: “Bêrîtan zaf girêdayê birayê xo bîye û ci ra zaf tesîr bîye. Bêrîtan mektuba xo de vatbîye ‘Seba ke ez beşdarê gerîla bena, birayê mi do mi ra heşme hîs bikero.’ Ma zext û zilmî ra nêtersenî. Ma rayîrê Bêrîtan de yî û do beyraqa xoverdayîşî yê aye nêkewo erd.”  


 ÎZMÎR