Nuştoxo îtalyayij Marîo Frotûnato bi sernuşteyê “Û kes nêwirzeno payan ser” meqeleyêk rojnamayê Suddeutsche Zeîtûngî de nuşte û derheqê pakîya etnîkî ya kurdan de bêvengîye sey tedeşîyayîşê ehleqî yê rojawanî nirxnaye.

Marîo Fortûnato yo ke tena Îtalya de ney Ewrupa de zî bi senaryo û romananê xo yeno şinasnayene, beşê “nuştoxo mêman” ê rojnameyê Suddeutsche Zeîtûngî yo ke rojnamayanê sereke yê Almanya ra yew o de bi sernuşteyê “Û kes nêwirzeno payan ser” meqeleyek nuşte. Fortûnatoyî meqeleya xo de vera galanê îşxalî yê Dewleta Tirkan a vera Vakur û Rojhelatê Sûrîye, bêvengîya hêzanê rojawanî bi huşkî rexne kerde û persa “Paştgîrîya Ewrupa kotî ya?” pers kerde.

Fortûnatoyî tevgerê 1968an a paştgîrîya Vîetnam û Cezayîrî arde vîrî û nîşan kerd ke ê tawan bi se hezaran merdimî vejîyaybî meydanan. Nuştoxê îtalyayijî dîyar kerd ke payîzê emserrî de kurdî amey bombardûmankerdene û bi vateyanê “xemserdî, tevizîyayîş û bêerjî” paştgîrîya kurdan nêkerdiş rexne kerde.

Kesî ma ra nêvat ke ma minetdarê kurdan ê

Nivîskar Marî Fortûnatoyî dîyar kerd ke kurdan şerê vera cerganê DAÎŞî de bedêlê giranî dayî. “Nê şarî ma DAÎŞî ra reynayî ke nê rêxistinî Parîs, London û Berlîn de çalakîyê terorî kerdêne. Labelê Ma ra kesî kurdî sey dostan dîyar nêkerdî û nêvat ke ‘ma minetdarê înan ê.”

 Nuştoxî nîşan kerd ke kurdan bi nameyê demokrasî û azadîya Rojawanî zorê DAÎŞî berd û bale anite serebûtanê ke 9ê teşrîna verêne ra bîyo Rojawanê Kurdîstanî de qewemîyenê ser. Nuştoxî sîyasetê Amerîka û hêzanê mîyanneteweyî bi hawayêkê giranî rexne kerdî.Nuştoxî dîyar kerd ke Dewleta Tirkan û îdarekerê xo yo dîktator vera kurdan çekanê kîmyewîyan xebetnenê. Û reyna dîyar kerd ke herême de pakîya etnîkî yena kerdene.

Marîo Fortûnatoyî bi kilmî meqeleya xo de dîyar kerd ke rojeva merdimanê Londra û Roma de şerê vera kurdan çin o û vat: “Kurdî ca û waranê xo ra yenê vetene û nayewe çimanê merdimanê rojawanî de feleketkê merdimî nîyo.” Fortûnatoyî meqeleya xo de vera galanê îşxalî yê Dewleta Tirkan a vera Vakur û Rojhelatê Sûrîye, bêvengîya hêzanê rojawanî sey tedeşîyayîşê ehleqî pênase kerde.

Marîo Fortûnato yo ke bi serran o Londra de yo û serekîya Enstîtuya Kulturî ya Îltalya kerde, serra 2007î de bi romanê xo yê bi nameyê “Şer de Roja Bêgunehe” gelek xelatê edebîyatî girewtî. Fortûnato yo ke Londra û Roma de maneno kovaranê L’Espresso û La Stampa yê Îtalya de bi serûber meqeleyan nuseno.

 

MERKEZÊ XEBERAN