Çapemenî xebetnayîşê domanan meşrû kena

Rewşa feqîrî û şerî ver tewr zêde domanî tesîr benî. Domanî emrê xo yê şenikî de karê giranan de xebetîyenî. Unîversîteya Bîlgî ya Stenbolî ra Akademîseyene Doç. Dr. Pinar Uyan Semercîye ke domanê ke Edene de yenê xebetnayîş ser o cigêrayîşêk kerdbîye û qala xebetnayîşê domanan kerde.

Semercîye vist vîrî ke, “Ganî Tirkîya de hûmara domanê xebatkaran bêro zanayîş û wina va: “Xebetnayîşê domanan teberê qanûnan de yo. Ganî keye û şert û mercê cuyê domanan ser de baş bêro vindetiş. Çimkî nê keyeyî seba ke mecbur î domananê xo danî xebetnayîş.”

Fehmêko nêbaş virazena 

Semercîye peynîya qiseykerdişê xo de wina va: “Domanî tena hêgayan de nê, xeylê gureyê giranan de yenê xebetnayîş û cok ra rewe yenê zewecnayîş. Emrêko şenik de barê keyeyî dîyeno milê domanan ser de. Çapemenî ziwanê xo yê xeberan de rewşa domanan meşru kena. Xeberê sey ‘şiwane bî, la bî yewin’ de ma na rewşe dî. Erj nêdîyeno merdiman û xeberê domanan normal yenê dîyayîş. Çapemenî komel de fehmêko nêbaş virezena.”