Dewleta Tirk ke Efrîn û herêmên Şehba topbaran kena, dewa Kefranton de doman û cinî zî mîyan de 3 kesan qetil kerd, 8 sivîlan zî kerd dirbetin.
Topbarano ke şewa verî hetê artêşa tirk û çeteyanê ci vera dewanê Mirenar, Fîlat, Qetma, Qestelcindo ê herêma Şêra, dewê Cilber û Îska yê herêma Şêrawa virazîya de qetlîamêka sivîlan amê meydan. Artêşa Tirk û çeteyanê ci herzewbîn sûkeka Erfad (Til Rifat) Minix, Şêx Îsa û Bîlûniyê yê girêdayê herêma Şehba ke hetê Artêşa Şoreşgeran amey xelesnayen zî topbaran kerd.
Dewan topbaran kerd
Netîceyê topbaranî de cinîya bi nameyê Sebah Îsa zî mîyan de, 4 sivîlî bî dirbetin. Kesê dirbetinî wedarîyay nêweşxaneyê Avrînî. Hêrîşê vera dewa Yazî Bax û Keferato yê herêma Şehba de zî 3 sivîlan weşîya xo kerd vinî û 4 kesê ke eynî keye ra yê zî bi giranî bî dirbetin.
Kesê ke weşîya xo kerdî vinî wina yê: Xezala Yûsif (40), Mûawiya EL-Yûsif (13), Tebarik EL-Yûsif (13). Kesê ke bî dirbetin zî wina yê: Xensa El-Yûsif (18), Rinda El-Yûsif (23), Fîdaa El-Yûsif a (19) û Aya El-Yûsif (16).
Çimeyanê weşîye aşkere kerdî ke rewşê dirbetinan giran a. Dewa Kefiranton ê herêma Şehba Sibata 2016’î de komanê çete yê Cebhet Fetih EL-Şam (Cebhet EL-Nesra) ra amêbî xelesnayîş.
Efrînijî ewro protesto kenê
No mabên de ewro Efrînijî yew nûmayîşêko tarîxî viraznenê. Bi no meşî Efrînijî dê cewab bidê hewldayîşanê dagirkerdişî yê dewleta Tirk. Yeno pawiten ke bi des hezaran Efrînijî ewro tewrê nûmayîşî bibê û AKP protesto bikerê.
EFRÎN