Sûka Fransa Strasboûrg û xêlê cayan de ceniyanê kurd polîtîkayanê tecrîd û herbî rê nêrazîbiyen damusnay û sozê azadkerdişê Rayverê xo day. Hereketê Ceniyanê Kurd yê Awrûpa ver bana CPT û Konseyê Awrûpa de bi slogana ‘Cenî serva Rayverê xo û serbestiya ci nûmayiş de yê’ mitîngekê viraşt. Bi seyan ceniyê ke welatanê ciya ra herikyay Strasbûrg CPT ra waştî ke şiro Îmrali. Parlamentera HDP Dîlek Ocalan, Azaya Kordînasyonê KJA Ceylan Bagrîyanik ra piya xêlê temsîlkarê partiyanê Fransa tewrê nûmayiş bî. Temsîlkara TJK-E Nûrsel Kiliç qisey kerd û hayr ant qetlîamanê dewleta tirk û tecrîdî ser.
‘Ganî CPT bikewo dewre’
Parlamenter Dîlek Ocalan zî qisey kerd û aşkere kerd ke maseyê çarekerdiş hetê hikûmeta Erdogan’î werte ra wedariya. Ocalan aşkere kerd ke şexs dê Ocalan’î de pêrokîn şaran rê tecrît yeno ferzkerdiş. Dîlek Ocalan da zonayen ke, eke CPT îşkenceyê Îmrali ra çimanê xo bigîro se, do bibo piyakarê sûcî û wina va: “Ganî CPT bikewo dewre û bi Birêz Ocalan’î ra pêdiyayin virazo. Ganî pêvacoyê çarekerdiş bi serbest veradayişê Ocalan’î reyna destpa bikero. Ser nameyê Yekîtiya Jinên Kurd ên Swîsre ra Nesrîn Yazar û û TJK-E ra Şemse Yildiz qisey kerdî û day zonayen ke heta ke Ocalan azad bibo ê dê meydanan de bê.
Nûmayişê bimbarekînî
Sûka Almanya Kîel de 4ê Nîsan bi şêligîn bimbarek bî. Badê girotenê vinderdişê hurmetî derheqê roj de qisey amey kerdin. Qiseyan de vajiya ke bi Rayverîna Ocalan’î de zihnîyeta koledarî û talanker şikîya. Sûka Almanya Aachen de zî Kurdistanijî serva 67. Roja dayikbiyîna Rayverê xo Keyeyê Civaka Kurd de are bî. Şayî de vera tecrîdî nêrazîbiyen damusniya û vengê berzkerdişê xoverdayiş ame dayen. Bimbarekînê sûka Dresden de sînevîzyon damusniya. Koroyê domanan zî şahî de sehne girot. Qiseyan de hayr anciya serbestiya Ocalan’î ser. Badê qiseyan darî amey kariten û govend amê giroten.
Pêrokîn tepişteyan rê serbestî
Sûka bîn yê Almanya Attenddorn de zî hetê Înisiyatîfê Jiyan yê ceniyan bi domanan jû şahî viraziya. Şahî de hayr anciya cayanê xoverdayişê xorayirberdişan û kampanya paştdayen ser.
Kassel de zî bimbarekîn meydanê Königsplatz de viraziya û qetlîamê ke Kurdistan de benê rê nêrazîbiyen damusniya. Nûmayiş de sloganê zey ‘Tetorîst Tirkiye’, ‘Awrûpa fînanse kena, Tirkiye bombevaran kena’, ‘Bicuw xoverdayişê YPS”, ‘Bicuw Serok Apo’ berz bî. Peycoy Navendê Kurd yê Kassel de rojbiyîna Ocalan’î bimbarek bî.
Paytexta Avûstûrya Vîyana de Ciwanên Azad bi şiyayişê meşaleyî hayr antî tecrîdê vera Ocalan’î ser. Nûmayiş de tecrîdî ra piya terora dewleta tirk amê lanetkerdiş. Welatijê ke bi sloganê ‘Bê Serok Cuwyan Nêbeno’ heta ver konsolosxaneyê Tirkiye ray şî waştena serbestiya Ocalan’î û pêrokîn tepişteyan kerdî.
Darî kariyayî
Kurdê ke Swîsre de cuwyenê bi nûmayişanê ciya 4ê Nîsan bimbarek kerdî. Sûka Swîsre Bîenne de Kurdistanijê ke Navendê Civaka Demokratîk de telewe bî, rojbiyîna Rayverê xo bimbarekkerdî û çormeyê Gola Bîenne de darî karitî. Qiseyan de hayr anciya tecrîdê vera Ocalan’î ser û serbestiya ci waziya. Paytexta Danîmarka Kopenhag de zî coşê 4ê Nîsan estbi. Bimbarekîna rojbiyîna Ocalan’î ra piya, serragêra ronayişê PJAK zî bimbarek bi.
Paytexta Belçîka Bruksel de zî bi jû merasîm 4ê Nîsan bimbarek bi. Hemserokê verên yê KNK Tahîr Kemalîzade û Parlamenterê verên yê HDP Ozdal Uçer zî tewrê bimbarekîn bî. Qiseyan de serva ameyişê haştî û çarekerdiş hayr anciya rolê Ocalan’î ser.
Xoverdayişê topyekun
Sûka Îtalya Mîlano de merasîmê bimbarekîn hetê Komîteyê Ceniyanê Welatperwer komeleya Ponte della Ghisolfa de viraziya. Şahî de sloganê serva Ocalan’’î berz bî.
Paytexta Îngilîstan Londra de zî 4ê Nîsan de Jinên Ciwanên Azad bi şiyayişeke tecrîd protesto kerdî. Ceniyê Ciwan yê ke Woodgreen de are bî, bi slogananê zey ‘Bê Serok cuwyayiş nêbeno’, ‘Tolhîldan’, ‘Ocalan’î rê azadî, Kurdistan’î rê statu’ heta ver Navendê Civaka Demokratîk ray şî. Badê şiyayiş gencan Navendê Civaka Demokratîk de şayî viraştî. Şayî de xoverdayişê YPS û YPS-JIN ame selamî kerdiş. Gencan veng day pêrokîn gencan ke vera polîtîkayanê qetlîam û tecrîd yê AKP serva xoverdayişê topyekun bikewê hereket.
Rojbiyîna ceniyan a
Banlîyoyê paytexta Fransa Parîs Vîlleneuve Saînt-Georges de zî hetê Hereketa Ceniyanê Kurd şayî viraziya. Bi seyan kesê ke tewrê şayî bî bi sloganan heskerdişê xo ardî zon. Qiseyan de vajiya ke, rojbiyîna Ocalan’î yena maneya rojbiyîna ceniyanê kurd zî.
NAVENDÊ XEBERAN