HAMDULLAH KESEN / MA/EDENE
Taxa Denîzî ya Seyhanê Edeneyî de 15 serra F.Ç. bi îdiaya kerdişê propogandayê rêxistinî yeno binçimgirewtiş, qeraqol de zî polîsan ey rê teklîfê sixûrî kenê û peynî zî teda û zilm kenê.
F.Ç. babete ser o wina vat: “Min zereyê wesayîtî de kutê û peynî ma şîyê qeraqolî, polîsan uca de min rê vatê; heqê to îxbar esto. Peynî zî vatê; taxa şima de kam dêsan ra nuşte nuseno, bê sixûrê ma bî. Peynî sandalya girewtê mîyana min dayê piro, polîsêk zî rîyê min rê çay eşt. Mudirîya Emnîyetî zî bi saetan min lingan ser de vindarnayê.”
Doktor min muayene nêkerd
F.Ç. aşkera kerd ke polîsan vatê ê ey rê fek veranêdê û wina qedîna: “Peynîya emnîyetî zî min berdê tiba edlîyî, ma polîstan reyde kewtê odeya doktorî. Tersî ra min doktorî rê nêvat polîsan min rê îşkence kerdê. Doktor zî min muayene nêkerd û kaxizêk da îmzekerdiş. Min dadgeh de serbest veradaya. Tersî rê min raporê derbî nêgirewt. Polîsan taxe rê ameyê hewna min persayê. Ez zaf qerqîzyena û ez wazena polîsan gerra bika.”