Destpêke Serhildana Şêx Seîdî rê hîrê rojî mendî. Di rojî dima ra 15’ê Sibate ya. Yane roja ke hemberê Rayverê Şarê Kurdî Abdullah Ocalanî komplo virazîyo a roja.
Senî wextê komplo mîyannetewî de fedayîyê girêdayî Abdullah Ocalan’î vejîyayê çalakîye fedayî viraştî, wextê Şêx Seîd de zî fedayîyê Şêx Seîd estbî. Fedayîye Şêx Seîdî mîyanê şervananê Şêx Seîd yê tewr şerker û bi cesaret bî. Nê fedayî pêro yenî pêser seba ke bajarê Amedî azad bikerêne, erzênê ser Amedî. Şerêk giran kenî. Giranîyê înan kewnê zerre Amedî. La zerreyî Amedî de îxanet beno, sernêkewnê tepîya agerîyenî.
Zerre nê fedayîyan de yew fedayî estbi. Nameyê eyê Mehê Evdî(Mehmet Gurkan) bî. O zî agereno dewe xo. Mehê Evdî Eşîra Şernanî ra, Dewe Xizginosî ra bî. Dewe Xizginosî, çend dewe bîn û Dewe Rîz fermîyetî de sey yew dewe yenî hesibnayîş. Dewe Xizginosî wextê Şêx Seîd de ser qezaye Licê yê Amedî bî. Hetê îdarî de giredayî Pêçarî bî. Dewleta Tirk, Serhildana Şêx Seîd dima ra serra 1940’an de Darahênî ra gireda û hetê îdarî de eşte ser Çewlîg.
Dewleta Tirk Serhildana Şêx Seîd dima ra serra 1927’an de bin nameyê Pêçar Tenkîl Hereketî caya ke destek dayo Şêx Seîd nê cayan de komkiştiş virazena. Hetê Dewe Rîz û Xizginosî, yane Gelîye Şernan û Gelîye Tawzalê Rîz de zî kera ser kera nêverdena. Pêronê dewan veşnena. Komkiştiş virazena. La reyna yew fedayîye Şêx Seîd teslîme dewleta tirk nêbeno. Dewleta Tirk senî nika korîcî estî uçaxî zî çeteyan rêxistinkena pê înan derheqê fedayîyen Şêx Seîd de hayî kam kena. Înan şêhîd visnena.
Seba Mehê Evdî zî hina kena. Çend çeteyan eyar kena, şirawena ser Mehê Evdî. Nê çeteyên yew Dewe Êlî Mîran di zî Dewe Vartug ra ye. Êlê Husê (Alî Elîveren) Êlî Mîranij, Evdê Mele (Abdullah Kabayel) û Hasan Kabayelê Vartugij, benê çeteyê dewleta tirk û kewnê Mehê Evdî dima. Mehê Evdî û birayê xo Ehmedê Evdî rojêk pîya şine arîye Dewe Rîzî, xele tewnenî. Nê çetê hayî gênî Mehê Evdî û birayê eyê honî Arîye Rîz de. Wirzenê şinê Arîyê Rîzî û uca de Mehê Evdî kişenê, serê eyê benî teslîme dewleta tirk kenî.
Nika giranîyê torne nê çeteyan sey baw û kalikanê xo dewleta tirkî ra çetetî kenî. Yan zî bîyê çeteyên Hîzbulkontra, Hudaparî. Tornê Ali Elîveren bîye ajanê dewleta tirk, di hewî gerîlaye kurd şehîd visnayî. Tornê Abdullah Kabayel û Hasan Kabayel’î zî Darahênî de bîyê qoricîyê dewleta tirkî, şarê kurdî kişenê. Tornê Abdullah Kabayel û Hasan Kabayel ayê bîn zî Darahênî, Çewlîg û Amed de bîyê çeteyê Hîzbulkontra, Hudapar û çetecîtiyê dewleta tirkî kenî.
Nika senî korîcî û Hîzbulkontra Hudaparij dişmenê şarê kurdîyî, baw û kalanê înan zî dişmenê şarê kurdî û Şêx Seîd bî. Sey Şêx Seîd vatibi ya, do tarnê ma qisase ma bigerênê. Nika tornê Şêx Seîdî qisase Şêx Seîd înan genî. Nika çîyê ke bajarê Kurdîstanê de qewimîyenê çîyê hinayê. Tornê fedayîyê Şêx Seîdî Mehê Evdî, Amed, Cizîr, Gever, Nisêbîn û bajarê bîn de qisase Şêx Seîd genî.