Çi heyf ke rayna gonîya ciwanan billa (vila) bena. Rayna kuçan de, gedeyî, extîyarî zî tede merdimê sîvîlî qetl benê. Rayna koyan ra cenazeyê ciwananê kurd û tirkan yenê. Rayna dewleta Tirkîya konseptê serranê newayan visto dewre. Yanî newe ra topyekun yew ceng dest pêkerdo. Rayna polîtîqaya kîn û nefretî, polîtîkaya şowenîzmî dekewta dewre. No ceng de, qeyde, heq, huqûq, qanûn, heqê merdiman visto yew pol (kinar).
Ma heme wext vanê ke, na mesele, bi kiştiş, bi red û înkarî çareser nêbena. Nê çewres serrî yo ke, no ceng dewam keno. Eke dewleta Tirkîya, na polîtîkaya xo de israr biko; hima zaf gonî billa bina û yew qaosêko pîl vejîno. Tirkîya Surîye ra bêterêr bena. Derdê nê hukmatî çî yo, ma fam nêkerdo.
Mesele sîyasî ya
No hukmat dîyalog nêwazeno, muzakere nêwazeno, aştî û demokrasî nêwazeno. Vanê; “Hemverê Dewleta Tirkîya de ma rêxistino bi çek nêwazenê. Ganî fek nê çekan ra verradê.” Hetta vanê ke, ma hinê ne hereketê kurdan, ne Ocalanî, ne zî HDP se mûxatab gênê.” Aseno ke hukmatê AKP, hinê bi temam fek prosesê çareserî ra verradayo. Heme kes zano ke, yew meseleya kurdan esta. Semedo ke na mesele, bi şeklêko demokratîk çareser nêbîya, nê ciwanî vejîyayê koyan ser. Na mesele sîyasî ya, ganî sîyaseten çereser bibo. Na mesela ancax bi dîyalog û muzakereyan çareser bena. Yewna rayîr zî çin o.
Meclîsê Tirkîya de 317 wekîlê AKP estê. Eke biwazê se, şîynê yew demo kilm de, na mesela çareser bikê. Mîyanê dewleta Tirkîya û Serek Ocalanî de yew dîyalog virazîyabi. Epey yew mesafe zî girîyabi. Peynî de 10 Maddeyan ser o, yew mutabaqat zî virazîyabi. No mutabaqat, Qesra Dolmabahçeyî de, raya umûmîye rê zî deklere bibi. Fam beno ke eke dewlete biwazo se, na mesela bi dîyalog û muzakereyan çareser bena.
Kurdî wazenê ke mîyanê pergalê Dewleta Tirkîya de xo bi xo, xo îdare bikê. Tayê roşnvîrî û demokratî vanê ke bi nê şertan, Xoserîya Demokratîke nîna munaqeşekerdiş. Çunku Qanûnê Tirkîya no munaqeşeyî rê manî yo. Eyb o, no qanûn, qanûnê Kenan Evrenî yo. Xora verî ganî no qanûno antîdemokratîk bibedilîyo. Semedo ke na mesele, bi hewayêko demokratîk çareser bibo, ganî sazîyê sîvîlan, demokratî, sendîqayî, sîyasetwanî, fikrê xo bi eşkera beyan bikê.
No çi tewir yew kîn û nefret o?
Verê JÎTEM û Ergenekonî kurdan qetl kerdnî. Eyro zî hêzê asayîşî kuçan de bi eşkera kurdan qetl kenê. Tîmê taybetî, dêsan ser o “Tîmê Esaddûllahî” û “Yeşîl ha ewta de yo” nusenê. Yeşîl (Mahmût Yildirim) merdimê JÎTEMî yo û serranê 90’î de Vedat Aydın zî tede epey kurdî remnay û qetl kerdî. Aseno ke yew het ra merdimê Ergenekonî, JÎTEMî newe ra dekenê dewre. Yew sey merdimê Ergenekonî Albay Cemal Temîzoz û şaredarê Cizîre yo verên Kamil Atak zî tede 9 merdimanê JÎTEMî berat kerdî û serbest verradîyayê. Nê merdiman, Şirnex û Cizîre de 21 merdimî qetl kerdê.
Yew het ra koyan de bi hewayêko hera, operasyonê leşkerî benê. Nê operasyonan de goristan û camîyanê nê goristanan, bombayan reyde xirabe kenê. No çi tewir yew kîn û nefret o? No çi tewir yew zîhnîyet o ke goristan û camîyanê goristanan, bi tanq, top û teyeranê cengî xirabe keno? Dinya de yewna ca de, yewer goristan û camîyan bi bombayan xirabe nêkeno. Şima yew ray nê merdimî kiştî, semedo ke zerrîya şima honik nêbena, şima mezelê înan zî bombayan fekenanê. Yanî şima nê merdiman di ray kişenê. Raşta ey nîjadperestey, endi ke çim û vêjdanê şima kor kerdo ke şima nişnê empatî zî virazî. Şima hinê aqil û îzan ra dûrî kewtê. Bi nê têgeyrê xo, şima adeta birayeya şaran bombardiman kenê. Eke na rewşa şima dewam biko, Tirkîya de do yew qaoso pîl bivejîyo.
Kurdî wazenê Tirkîya de bi “xoserîya demokratîke” xo îdare bikî. Kurdan Colemerg, Êlih, Gever, Şirnex, Nisêbîn, Silopî, Sûr û Farqîna Amede zî tede bi desan şaristan û qezayan de “Rayberîya xo” îlan kerda.
Meşî raştê hêrişan amey
Cizîre de 21 tenan cuyê xo vînî kerd. Nê 10 rojî yo ke Farqîna Amedî de “vejîyayîşê kuçan” qedexe yo. 6 sîvîlî ameyê kiştiş. Vanê ke “Ma hîrê mehlayanê Farqîne orte ra hewananê.” Farqîn de bi tanq, panzer û topan bombakerdiş dewam keno. Farqîn de semedo ke şîyayîşê hîrê mehlayan qedexe yo, sebeno-çibeno dîyar nîyo. Nê mehlayan de awe, elektrîk çin a. Şîyîşê zaxîre û çîyê werî zî qedexe kerdo. Goreyê vatişan gedeyî zî tede epey merdimî bîrîndar bîyê. Colemerg de Wekîlê HDP Abdullah Zeydan û Selma Irmak yew meşo demokratîk de raştê hêrişê polîsan ameyê û bîrîndar bîyê. Hewce keno ke no şer vindro û Farqîn ser ra derhal na abloqa hewanîyo.
HDP zî rêziknameyê xo de ca dayo “Rayberîya Xo”. No yew heqo meşrû, maqûl û ewrensel yew taleb o. Şar wazeno ke hukmat û Meclîsê Tirkîya, na mesele bigêro rojevê xo û hewayêko demokratîk na mesela çareser biko.
Nê 6 aşmî yo ke Serek Ocalanî ser o zî yew tecrîd dewam keno. Lazim o ke hukmatê AKP fek nê înadê xo yê şerî ra verrado. Ocalanî ser ra tecrîdî hewano û newe ra dest bi muzakereyan biko. Çunku rayîrê aqilê yew o. Lazim o ke heme kes bi aqlo selîm têbigeyro. Kiştiş de israr, şer de israr, çare nîyo. Gonî bi gonî nêşiwêna.