Çewlîg de 25ê Hezîrane de polîsan bi hawayêkê hemwext eşt xeylî adresan ser. Opreasyono ke vera Çeteyê Fuhûşî ame viraştene de 31 kesî ameyî tepiştene. Ame vatene ke ê ke ameyî tepiştene mîyan de hetkarê Serekê Şaredarîya Çewlîgî yê AKPyî Mûhîttîn Bûkan, polîs Ersîn Yildiz, qoricî Ahmet Varan, Mehmet Tekgoçeno ke rîyê hîzbûlahî ra wextêk zîndan de mendbi, endamê AKP û MHPyî ya pîya xeylî kesê ke dezgehanê fermîyan de xebityenê estê.
Ê ke oprasyon de ameyî tepiştene 29ê Hezîrane de sewqê edlîye bibî û nînan ra 10 kesî ameybî tewqîfbîyayene, 15 kesî bi şertê kontrolê edlî ameybî veradayene. 21 kesî zî serbest veradîyaybî. Derheqê dosyaya tehqîqatî de zî qerarê nimiteyî amebi girewtene.
Parlamentera HDPyî ya Amedî Semra Guzele na babete berde rojeva Meclîsî. Guzele vist vîrî ke no çete serra 2016î ra nata hetê polîsan ra yeno zanayene la rixmê naye vernîya ci nêna girewtene û wina va: “Çend serrî verê cu ciwanêk derheqê nê çeteyî de dîmenî teslîmê polîsan kerdî la polîsan derheqê çeteyî de tehqîqat nêda destpêkerdene û herinda naye de ciwano ke gerreyê çeteyî kerd, karê xo ra ame vetene.”
Guzele hetkarê Serokkomarî Fûat Oktayî ra waşt ke wa derheqê babete de cewabê nê persanê ci bido: “Qey polîsê ke hayîya înan çeteyî esta, 2016 ra nata vera nê çeteyî çîyêk nêkerd? Qey ciwano ke gerreyê çeteyî kerd, karê xo ra ame eştene? Qey dosyaya tehqîqatî de qerarê nimiteyî ame girewtene?”
ANF / ANQARA