2 serranê peyênan de xeylê herêmê Dêrsimî sey ‘waro taybetin’ îlan bîyî û ameyî qedexekerdiş. Qet şik çin o ke na rewşe ver xeylê hetî zirar vînenî. Nê hetan ra yewe zî kesê ke hingdarîye kenî yî. Babete ser o Serekê Yewîya Hingdaran Kazim Doganî qisey kerd.
Doganî va ‘2 serranê peyênan de xeylê mintiqayî sey Herêma Ewleyîya Taybet ameyî îlankerdiş û nêyî ver merdimî etirîyenî’ û wina domna: “Merdimî dewanê xo de seba ewleyîya xo etirîyenî. No zî tesîrê xo xelqkerdişî de nîşan dano. Çimkî nika hetê xelqkerdişî de kêmîbîyayîşêko gird esto.”
Astengîyî estî
Doganî dewamê qiseykerdişê xo de va ‘seba ke nuqtayê kontrolî estî, destûr nêdîyeno ke zexîre derbaz bibî’ û wina dewam kerde: “Hingdarî nêeşkenî seba hinganê xo çîyê lazim bibo, bîşêrî û nê nuqtayan de yenî astengkerdiş. Eke hingdarî mîyanê hinganê xo de kadroyan nêresnî, o wext nêeşkenî hingimên zî bigirî. Ma na nuqta de selahîyetdaran reyde pêvînayîşî zî viraştî. Ez hêvî kena ke do netîceyê bîyayeyî bivejyî.”
Doganî peynîya qiseykerdişê xo de va ‘verê cû 400 hingdarî estbîy, 2014 de na hûmare vejîyayî heta 800’ û wina qedêna: “Polîtîkayanê ‘ewleyî’ ver hingdarî yew bi yewe fek karî ra verdanî. Ewro hingdaran de nizdîbîyayîşo ke ‘xora zozanî qedexe yî, ma nêeşkenî şêrî. Ma wazenî hinganê xo biroşî’ esto. Ma qeydê nê hingdaran gênî. Tayê wazenî hinganê xo biroşî, tayê wazenî reyna biherînî. Merdimî nê polîtîkayan ver nêwazenî nê karî bikerî.”
DÎHABER/DERSIM