15ê Temûz ra dima, 131 televizyon, ajans û rojnameyî ameybî girotiş. Roja padîyayîşê înan ra heta nika reaksîyonê girdî damûsnîyay. Tewr vêşêr zî girotişê Zarok TV ver reaksîyonê girdî damûsnîyay. Netîceyê eno hêrs û nêrazîbîyayişî hukmatê AKP peyser game eşt û Zarok TV reyna abîya.
Zarok TV ra xêlê çî mûsîyayî
Zarok TVyo ke bi lehçeyanê ziwanê kurdî kirmanckî, kurmancî û soranî weşan kerdêne û qenalê televîzyonî yê sifteyîn yê domanan bî, 21ê Adare 2015 de dest pê weşanî kerdîbî. Zarok TV 29ê êlule 2016 de bi Qerarnameyê Hukmê Qanûnî hûmara 668 bi mehneya ‘Seba Asayîşê Milî rê tehdit o’ ameybî padayîş. AKPyo ke heme dinya de dişmenê çapemenîye ameyo îlankerdiş, qerarê padîyayîşê Zarok TVyî wedarna.
Tewr vêşêr zî domanî nayî ra bî kêfweş. Temaşekerdoxê werdî (qijkek) yê Zarok TV ardî ser zon ke ê Zarok TV ra xêlê çî mûsîyayê û rîwalê akerdişê qenala xo kêfweşîya xo aşkere kerdî.
‘Zarok TV pir weş o’
Domana bi nameyê Werdê Ebdî ya 10 serrî da zonayen ke ayî bi saya Zarok TV kurdî mûsîyaya û va, “Ez a bieşkera klamanê kurdî, şîrînokan (kewelok) û xêzefîlman fina da bîn temaşe bikera. Zarok TV pir weş o. Zey pêrokîn domanan ez zî kêfweş bîya.”
Nûpelda Nakiş a 10 serrî ke şina dibistanê kurdî zî aşkere kerd ke neyra tepya a do vêşêr Zarok TV temaşe bikero. Nûpelda vist vîrî ke zey domanan înan şîrînokan û xêlê bernameyanê bînî temaşe kerd û xêlê çîyê newî mûsîyayê û veng da pêrokîn domanan ke Zarok TV temaşe bikerê.
DÎHABER/AMED