Dîlok de Xoverodayişê 6 û 9’ê Citmenge de 5 kes cuyayişê xo dabî û ser no xoverodayişî yew serre vîyart labelê hema zî kiştoxî nêameyî dariznayiş û ser dosyaye zî bira nimiteye ame girewtiş. Pawitoxê dosyaye, seba dîyarbîyîşê kiştoxan dîmenê 500 GB waştbî û no ser zî dozger zî ser dosyaye bira nimiteye dabî.
Goreya rojnameya Evrenselî çarçiweya dosyaye zî tena hîrê faşîst ameybî girewtiş û nê faşîstî zî bi îfadeya şahîdo nimite amebî girewtiş. Şehrîban Sertkal zî no demî rayîrî ra vîyaraynî û bi gule zî ameybî birîndarkerdiş û Sertkal yew dosyaye de zey şikkerde yeno dariznayiş.
Dîmenan ra zî dîyar bi ke, qet polîs û cendirmeye, kiştox û komê faşîstî ra mudaxele nêkerdî, la nê komê faşîstî ala tirk kiriştênê, îşaretê vergo boz kerdî, destê înan de çek, zopa û kard estbî. Faşîstî ke biameynê girewtiş tena heqê ci de bi îdiaye şuxilnayişê çeko bêruhsat xebitnayiş ameynê kerdiş. Na roje ra nika bi seyan kurd ame binçimkerdiş û amey girewtişî.
Xoverdyaişê 6 û 9’ê Citmenge Dîlok de hetanî serî ra nika pwt. Adnan Erol bi baldarî şopneno. Erol dosyayê xoverodayişî ser vat ke çalakîyê Xoverdayişê 6 û 9’ê Citmenge faşîstan hezm nêkerdî û no ser zî hêrişê welatperweran kerdî. Çi heyf ke pêroyîya Tirkîyaye de 52 merdimê ma cuyayişê xo vinî kerd.
AKPe pawit
Erol wina vat: “Dîlok de taybetî xoverdayiş mîyanê rojê 9 û 10’ê citmenge de hera bî. Taybetê faşîstan ban, tax û kuçeyê kurdan ra hêriş kerdî. Çi heyf ke dîmenan ra zî ameynî vînayiş ke faşîstan bi polîsan hêriş kerdî. Nê faşîstan veşna û rijnay û encamî de 5 welatperwerî qetil kerdî. Çi heyf ke hema zî qetilkarê nê 5 kesî nêame dîyarkerdiş .”
Bira nimiteye
Erol aşkera kerd ke dozgerî qet guleyê ke ser cenazeyan vejîyaybî nêeşrawitbî balîstîkî û wina vat: “Na rewş zî mojnena nê 5 kesî hetê polîs, cendirmeyê dewleta tirk amey qetilkerdiş û no ser zî dozgerî ser înan bira balîstîkî nêda. Ma dozgerî ra dîmenan waşt labelê dozgerî varişt ser dosyaye bira nimiteye da, ma zî îtîraz kerd la nêame qebulkerdiş. Ma do bira dozgerîye hetanê Dadgeha Mekaqanûnî bîşêrî.”
NAVENDA XEBERAN