Partîya Demokratîke ya Şaran (HDP) bade ke 20ê teşrîna verêne de dest bi xebatanê weçînayîşê herêmî kerd. HDPyî na çarçewa de partîyanê bînan yê kurdan reyde pêvînayîşî viraştî. Nê pêvînayîşan de munaqeşeyê yewîya neteweyî zî ameyî kerdene.
Parlamenterê HDPyî yê Amedî Îmam Taşçiero ke beşdarê nê pêvînayîşan bi, pêvînayîşan ser o melumat da. Taşçierî va ‘kurdî se serrî verê teberê îradeya xo de ameyî parçe kerdene’ û wina domna: “Dima ra mîyanê xo de zî parçe bîyî. Ganî kurdî vera nê parçebîyayîşan de yewîya xo awan bikerî. Eke 2013 de kongreya yewîya neteweyî bivirazîyayêne, ewro şer nêbîyêne û kurdî bîyêne wayîrê statuyî.”
Taşçierî dewamê qiseykerdişê xo de wina va: “Ganî kurdî her parçe de seba yewîye bixebetyî. Çimkî heta ke yewîye awan nêbo, do hertim tehdîdê îmha û asîmîlasyonî bibî. Yewîye seba kurdan nêba, nêbena ya. Kurdî bêyewîye nêşenî bibî wayîrê statuyî. Heta ke yewîye awan nêbo, do şer xorî bibo û qetlîyamî bivirazyî. No het de rolo tewr gird keweno milê HDPyî ser. Cok ra pêvînayîşî tena seba weçînayîşî nêbenî.”
MA / AMED