Weçînayîşê 24ê Hezîrane rê 13 rojî mendî û xebatê ke Kurdistan, Tirkîya û Ewropa de yenî kerdiş her ke şono ver bi peynîye hîra benî. Namzedanê HDPyî yê Amedî ra Selçuk Mizrakliyî va ‘Ewro lazimîye bi aştîye esta û mîmarê aştîye Birêz Ocalan o’ û wina domna: “Birêz Ocalan 3 serrî yo binê tecrîdî de yo. Tena hêz û xeta ma eşkenî nê welatî şer û cîyakerdişî ra rizgar bikerî.”
[caption id="attachment_112241" align="alignright" width="247"]
Hişyar Özsoy[/caption]
Weçînayîşê 24ê Hezîrane rê tay mend û Kurdistan, Tirkîya û Ewropa de lez dîyayo xebatanê weçînayîşî. Partîya Şaran ya Demokratîke (HDP) çarçewaya xebatanê weçînayîşî de hewl dano heme cayan de xo biresno şarî û destek biwazo.
Namzed û xebatkarê HDPyî xeylê cayan de şarî reyde ameyî têhet û xebatê weçînayîşî domnayî. Cayê ke xebatê weçînayîşî tede yenî domnayî ra yew zî Çewlîg o. Merkezê Çewlîgî Yeşîl Vadî de programê fitarî ame organîzekerdiş û namzedê HDPyî Erdal Aydemîr, Nîhat Aksoy û Şefîka Dogane û parlamenterê HDPyî Hişyar Ozsoy beşdarê programî bîyî.
Tîya de Ozsoyî qisey kerd û wina va: “Ey huqûq girewt binê lingan û Demîrtaş mehkum kerd. Labelê hîna zî terseno. Nika hewl dano rasteyan de Demîrtaş sîya bikero. Dêmek Demîrtaş hîna zî ey eciz keno. Ma 7ê Hezîrane de karêk dabî destpêkerdiş û ma do 24ê Hezîrane de ê karî biqedênî. Îdrîs Baluken zî do zîndan ra bivejîyo û sîyaset bikero. Labelê cayê Erdoganî sîyasetê Tirkîya de çin o.”
Wa berpirsîyarîya xo bîyaro ca
Ozsoyî bale ant ewleyîya sindoqan ser û wina va: “Wa kurdê Çewlîgî weçînayîşanê 24ê Hezîrane de berpirsîyarîya xo bîyaro ca. Ganî bikarardişê raya xo ra dima ma wayîrê sindoqanê xo bivejyî. Seke şima zanî verê cû pisîngî kerdî ortaxê guneyanê xo. Labelê nika ra pey se beno wa bibo, ganî çi destê ma ra bêro ma bikerî.”
[caption id="attachment_112242" align="alignright" width="253"]
Emrullah Cin[/caption]
Şar do wayîrê îradeya xo bivejîyo
Hemserekê Şaredarîya Wêranşarî ya Riha Emrullah Cînî zî derheqê weçînayîşê 24ê Hezîrane de qisey kerd û vînayîşê xo ard ziwan. Cînî qiseykerdişê xo de qala qayûmê ke ameyî tayînkerdiş kerd û wina va: “1 serre û nîme yo ke qayûmî heme îmkananê dewlete bikar anî, labelê ti kar nêkerdî. Ez bawer kena ke 24ê Hezîrane de no hetê şarî ra bêro dîyayîş. Şar do 24ê Hezîrane de wayîrê îradeya xo bivejîyo. Serkewtişê weçînayîşan yeno manaya şîyayîşê qayûman. Netîceyê sindoqan do eynî wext de xizmetê aştîya Rojhelatê Mîyanênî bikero.”
[caption id="attachment_112243" align="alignright" width="224"]
Selçuk Mızraklı[/caption]
Lazimîye bi aştîye esta, mîmarê ci zî Ocalan o
Namzedê HDPyî qezaya Erxenî ya Amedî de werdêkê fitarî de şarî reyde ameyî têhet û şarî ra destek waştî. Şar eleqeyêko gird nîşanê namzedan da. Tîya de namzedan ra Selçuk Mizrakliyî qisey kerd. Mizrakliyî va ‘raştîya xo AKP qedîyayo’ û wina dewam kerd: “Rayîro ke ver bi aştîye şono, giran û zehmetin o. Ma eşkenî weçînayîşan qezenç bikerî. Ewro lazimîye bi aştîye esta. Hêzê ke aştîye awan bikerî, cografyaya ma de yî. Mîmarê aştîye Birêz Ocalano ke cuya xo seba demokrasî û aştîye feda kerdo yo. 3 serrî yo binê tecrîdî de yo. Tena hêz û xeta ma eşkenî nê welatî şer û cîyakerdişî ra rizgar bikerî.”
MERKEZÊ XEBERAN
