3ê tebaxa 2014 de çeteyanê DAIŞî hêrişê bajarê Şengalî kerdbî û bi hezaran êzidî qir kerdbî. Reyna çeteyan bi hezaran cinî û domananê êzidî zî remnaybî û sey kole sûkanê bajaran de rotbî. Ciwanê êzidî zî seba heyfgirewtişê xo rêxistinê YBŞ û YJŞyî awan kerdî. Dima ra zî sozê heyfgirewtiş û rizgarkerdişê êzidîyan dayî. Şervanê YJŞyî azadîya Şengalî ra dima veng dayî şarê êzidî ke wa biagêrî erdê xo ser. Babete ser o şervanê bi nameyê Perwîn Bêrîtane, Jîyanda Êzidîxane û Evîndar Êzidîxane qisey kerdî.
Şarê ma wa biagêro
Bêrîtane diyar kerde ke ‘seba pawitişê erdê xo ganî ciwanê êzidî biagêrî Şengal û cayê xo mîyanê YJŞyî de bigîrî’ û wina va: “Ganî şarê Şengal û ciwanî biagêrî erdê xo ser û bajarê xo çeteyan ra bipawî. Ma êdî neheqîyan qebul nêkenî.”Jîyanda Êzidîxane zî wina va: “Bi hezaran cinî û domanî ameyî remnayîş û sey kole ameyî rotiş. Ma sozê heyfgirewtişî da. Seba ke fermanêko bîn nêbo, ganî êzidî bibî yew û pawitişê Şengal de cayê xo bigîrî.
Bitaybetî zî ganî cinîye sîstema serdeste ver sere wedarnî û tewrê YJŞyî bibî.”Evîndar Êzidîxane nîşan daye ke heta nika 73 fermanî ameyî êzidîyan ser û wina va: “Êzidîyê ke kampê Başûr û Vakur de manenî, wa biagêrî Şengal û paştî bidî hêza azade. Seba pawitiş û azadîya Şengal ma zaf şehîdî dayî. Cok ra ma sozê heyfgirewtişê cinîyanê êzidî da.”
ŞÛJIN/ŞENGAL