Hukimatê AKP ke, bi deshezaran polîs, lejker û sewbîna çeteyan rişto Kurdistan û fermanê êrişê qeza û sûkan da, raştê xoverdayîşê şarê Kurdî yena. Kurdistanijî bi xoverdayişê topyekûn cewab danê hewldayenê hêriş û qetlîaman. Çeteyê AKP yê ke, hiqûqa herb nêsilasnenê û sûcê merdimatî kenê, roja Şemî bi tanq û topan Cizîr de, hêrişê yew keyeyî kerd. No keyeyî mîyan de 28 kesî estbî û nika pêrokînî dirbetinê giranî yê. Zereyê kesê ke keye miyan de mendî de, Midurê Nuştegeh ê Rojnameya Azadiya Welat Rohat Aktaş zî esto. Semedo ke hêzê dewlete nêverday ke kes mudaxaleyê dirbetinan bikero, heta nika 5 kesî weşiya xo kerdî vinî. Rojnameger Rohat Aktaş tewrê Ozgur Gun TV bi û derheqê babed de zonayişan da.
Dewlet qetil kena
Rohat Aktaş ciresna ke nê hîrê çar rojî yo ke hêzê dewlete bi tanq û topan hêriş kenî û bombevarnayîşî reyde wazenî qetlîaman bivirazî û wina verdewam kerd: “Nika tîya de vîst kesî ra vîşêr birîndar î û mîyanê nê birîndaran de ê ke birîna înan giran o zî estî. Xora aw û ceryanî zî qerifnayî û bi no hawa her kesî mergî reyde rî bi rî veradayî. Ma nika 25 kes î û heta nika 5 kesan cuya xo day. Hetê ma de çi haletê weşîye estî û çi zî kesê ke bişînbî birîndaran reyde eleqeder bibî, estî. Ma verîya nika zî waştbî ke seba birîndaran ambulansî bêrî la nêverdanî ambulansî bidekewî mîyanê taxî.”
Potê pitikan şixûlnenê
Aktaş dergeyîya qalîkerdişê xo de hayr ant dermankerdişê dirbetinanê xo ser û qalîkerdişê xo wina domna: “Semedo ke haletê weşîye hetê ma de çinyê ke ma dirbetê xo bipêşê, ma zî semedê dirbetinanê xo potikê bebekan û pemeyê nivînan vejna û bi no hawa dirbetê xo pêşnenê. Nika aw û werd zî çin o.” Aktaş’î qalîkerdişê xo de dîyar kerd seba ke qatê corê ya awanîya ke, ê têdeyî rijyayo û wina dergî da qalîkerdişê xo: “Ma nika bodrumê yew banî de xo stare kenî û semedê qalîkerdişê telefonî ma vejyenî qatê corî û no zî semedê ma rîskêko pîl o. Çimkî qatê corî yê awanîya ma hetê hêzê dewlete ra bi tanq û topan hema zî yenî xirakerdiş.”Aktaş tewr peynî wina vat: “Ez bi xo polê xo ra birîndar bîya û mîyanê birîndaran de ê ke rewşa înan giran o zî estî û her ke şono rewşa înan giranêr beno. Rayna mîyanê birîndaran de domanî zî estî û ma payîvê hetkarîye yî. Ez veng dana ke wa heme şarê Kurdistanî verê xo bidî Cizîr û Cizîrî ra wayîr bivejî û tena nêverdî.”
NAVENDÊ XEBERAN