No hefte zî dewlete bi qerarnameyê hukmê qanûnî ya (KHK) û bi êrîşanê fiîlî ya nasname, kultur û ziwandê ma ser o êrîşê xo dewam kerdî. Dewlete Dibistana Ferzad Kemangerî û rojnameyê Azadîya Welatî zî girot. Dewlete bi heme kîn û nefretê xo ya eşt şaredarîya Amedî ser. Her roj bi qerarnameyanê neweyan a wazenê şarî bêveng û bê pawitiş bikerê ke hîmê faşîzmî saxlemêrî bikerê.

Labirê teslîmbîyayîş çinyo, zulm esto, xoverdayîş zî esto.. Xo ra seranserê tarîxê komara Tirkîye de ziwanê ma qedexe bi. Çend îmkanê ke nê serranê peyênan de kurdan bi xo peyda kerdîbî zî bi nê qerarnameyanê peyênan a wazenê orte ra wedarnê. Tayn “kurd”ê ke aşiqê tecawuzkarê xo yê, netêda; bi milyonan a kurdê bînî, her kes goreyê îmkananê xo, ver a na faşîzma dewlete û AKPê vijêno. Winî aseno ke şer do hewna gurr bo.

Dewlete çi rê ziwanê ma ra hend tersena? Çi ke ziman seba kurdbîyayîşî yan zî kurdmendişî faktoro tewr muhîm o. Ke kurdkî nêro wendiş, nuştiş û nêro goştareykerdiş, do her ke şiro zeîf bo. Cora dewlete wazena ke kurdî (vakur de kurmancî û kirmanckî) nêro wendiş û nuştiş ke şar xo vîra bikero ke bê nasname bimano. 

Goreyê cigêrayîşanê îlmîyan, domanêda/domanêdo hewt-serre, wexto ke dest bi dibistane kena/keno 5000-7000 çekuyî zano. Pekî nê çekûyan senî û kotî museno? Kê xo de; may, pî, way, bira, embirîyan,  merdimanê xo û kesê bînî yê ke dorûverdê xo de pa qisey keno ra museno. Û verdibistane de zî bi hetkareya mamosteyanê xo ya ziwanê xo aver beno. Cora wexto ke dest be sinifa hewtine keno 5000-7000 çekuy zano.

Labirê domanê ma kurdan seba ke nê îmkanan ra mehrûm ê, çend sey çekûyan ancax zanê. Yewdo 17 serre, ke bi îstîkrar bi ziwandê xo ya wendo, goştarey kerdo 50 hezar ra heta 70 hezar çekuyî zano. Ke nêwendibo, nênuştibo û goştarey nêkerdibo 15 hezar ra heta 17 hezarî çekuyî zano. O zî girêdayê civaka ke te de ciwêno yo. Yanê ke dorûverdê ci de ziwan a bêro qisekerdiş, na reqemê zaf kemî bena. Dewlete na raştey zana. Cora nêverdana domanê kurdan dibistanan de bi ziwandê xo ya biwanê, binusê û goştarey bikerê.

Yewdo/yewda dorûverê 20 serreyî de rê 50 hezar çekuyî lazim ê ke bişo/bişa xo heme babetan de; kultur, ziwan, edebîyat, sîyaset, ekonomî…  weş îfade bikero. Wexto ke hendayê yan zî, qe nêbo, nîmeyê nê çekuyan nêzano, nêşeno xo bi ziwanê xo yê zikmakî ya îfade bikero û ziwanêdo bîn, ziwano ke mecbûr bîyo pa biwano ya qisey keno. Ma her roj televizyon û kombîyayîşan de vînenê û goşterey kenê, xeylê kesî vanê “qisûr mewinîyê, ez nêşena xo bi kurdkî ya îfade bikera.” Tabî no vatiş de çîyêndo pozitîf zî esto. O zî o yo ke, ê ke kurdî nêzanayîşî ze “qisûr” vînenê her roj benê vêşî.

Averşîyayîş û wahêrê qîmetbîyayîşê ziwanê,  girêdayê çend û senî bikaradişê/şixulnayîşê ê ziwanî yo. Ke ti ziwanê goştarey nêkerê, nênusê, nêwanê o ziwan aver nêşino. Dewlete na raştey zana cora ziwanê ma rê zulm kena. Ziwanê ma dibistanan de qedexe kena, televizyon û radîyoyanê ma kilît kena, kitabanê ma qedexe kena, dibistanê ke ma bi xo ronayê zî kilît kena.

Ganî ma kurdî zî îmkananê xo pêrine bi kar bîyarê û hetê ra na polîtîkaya dewlete ya faşîste ver bivijîyê û heta bîne ra zî ziwanê xo bi kar bîyarê.