Dayîka Hetkara Hemserekîya Pêroyî ya HDPyî Aysel Tugluke Hatun Tugluke 2 rojî ver wefat kerdbî û wextê definbîyayîşê cenazeye de raştê hêrişê grûbêka nîjadperest ameybî. Grûba faşîste bi kerra û tekbîran reyde hêrişê merasîmê cenaze kerdbîye û nêverdaybî ke cenaze bêro definkerdiş.
Wexto ke cenaze raştê hêrişî ameye, kesê ke beşdarê merasîmî bîyî, meyît mezel ra vet û waşt ke reyna tepîya bîşêrî Cemxaneyê Batikentî. Labelê wesayîtê cenaze vejîyayîşê goristanî de ame vindarnayîş û dima ra cenaze resa cemxane. Babete ser o Pêroyî ya HDPyî Serpîl Kemalbaye û Verfeka Meclîsê Cinîyan yê HDPyî Besîme Koncaye qisey kerdî.
Kemalbaye vera çîyê ke ameyî cuyayîş de reaksîyon nîşan daye û wina va: “Dejê ma gird o û dayîka Hatune rê Homayî ra rehmet wazenî. Wa serê şarê ma weş bibo. Wexto ke ma seba definkerdişî şîyî goristan, kesêkî ame û ma ra va ‘şima nêşenî tîya de defin bikerî’. Sere de grûbêka şenike bîye û polîsî şênayêne mudaxale bikero. Labelê ê paweyê tarîbîyayîşê hewa û kombîyayîşê kesan mendî. Wexto ke ma şî ewja de wezîfedarê ewleyîye çinêbî. Dima ra îxtîmal estbî ke mezel raştê hêrişî bêro. Cok ra ma cenazeya xo girewt û ma do Dêrsim de defin bikerî. No hêrişêko faşîst o û nîno qebulkerdiş. Aysel Tugluke bi hawayo neheq tewqîfkerde ya. Ma nînan şermizar kenî û ma do têkoşînê xo bidomnî.”
No bi hawayo zanaye ame kerdiş
Koncaye zî va ‘çîyê ke goristan de ameyî cuyayîş, zaf dejin î’ û wina dewam kerde: “Na raştîyêka trajîk a û ganî tarîxê Tirkîya de çîyêko winasî nêbîyêne. Ma mecbur mendî ke dayîka Hatune mezel ra vejî. Ma provokasyonêkê reyde têrî mendî. Ma seatanê serê sibayî de muracat kerdbî û selahîyetdaran ardişê cenazeye erey vistî. Sere de hêrişkarî 2-3 kesî bî, labelê polîsan tedbîr nêgirewt. No bi hawayo zanaye wina ame kerdiş. No hêriş vera heme bawerî û merdimîye de ame kerdiş.”
Serekê Pêroyî yê Komeleya Heqê Merdiman (ÎHD) Ozturk Turkdoganî zî va ‘sebebê nê hêrişî polîtîkayê nefretî yê îqtîdarê AKPyî’ û wina domna: “Eke şima tim HDPyî hedef nîşan bidî, şima do bi hawayo asan grûbanê faşîstan bîyarî têhet. Tirkîya de heta ke problemê kurd çareser nêbo, çîyêk çareser nêbeno.”ANF
HDPyî hêriş berd Meclîs
Parlamenterê HDPyî Alîcan Onluyî derheqê hêrişî de seba ke Serekwezîr Bînalî Yildirim cewab bido, persî pers kerdî. Persê ke Onluyî persê Yildirimî kerdî, nê yî: “Gelo şima wazenî tirk, kurd, elewî û armenîyî pîya bicuyî? No hêrişo ke vera elewî û kurdan de ame kerdiş, gelo seba şarê kurd mesajê ‘ma tehamulê ganîyê şima nê, merdeyê şima daxî nêkenî’ yo? Şima do vera nê sucî de tehqîqatêk biakerî an nê? Gelo do Serekwezîrî vera nê hêrişî de îzehetêk bido an nê? Gelo do Serekîya Karê Dîyanetî no derheq de îzehetêk bido an nê, bêvengmendişê ci yeno manaya tesdîqkerdişî an nê?”
Ma do wayîr bivejyî
Kongreya Komelo Demokratîk (KCD) zî babete ser o îzehetêk daye. KCDyî îzehet de hêrişî sey sucê merdimîye girewt dest û wina va: “Wa nê barbarî bi hawayo baş bizanî ke hetê ke bawerîya xo demokrasî rê ardî do wayîrê dayîka kurd Hatun Tugluka ke xeylê dej û zulmî cuyaya bivejyî. Ma no hêrişêko xayîn şermizar kenî û sere de Keyeyê Tuglukî û heme şarê xo rê serweşî wazenî. Wa Homa rehma xo bido Dayîka Hatune.”
ANF/STENBOL/ANQARA