9ê Teşrîna verêne ra nata artêşa Tirk û çeteyê ci bi tanq, top û teyarayan hêrişê Vakur û Rojhelatê Kurdîstanî kenî. Vera hêrişê dagîrkerîye yê artêşa Tirkî û çeteyanê ci de Kurdî zî payan ser o yî. Bitaybetî welatanê Ewropa de, Rojawan, Rojhelat û Başûrê Kurdîstanî de reaksîyon nîşanê çalakîyan dîyeno.
Kurd û dostê Kurdan welatanê Almanya, Swîsre, Swêd, Avusturya, Fransa, Danîmarka, Îspanya, Kibris, Norveç, Hollanda û sewbîna xeylê cayan de vejîyayî raşteyan û hêrişê artêşa Tirkî protesto kerdî. Bi hezaran çalakgêran raşteyan de ‘Bicuye xoverdayîşê Rojawanî’, ‘Bicuye YPG/YPJ’, ‘Katil Erdogan’, ‘Katilê domanan Erdogan’, ‘Boykot Tirkîya’ û sewbîna siloganî eştî. Çalakgêran dewletanê mîyanneteweyîyan ra waşt ke wa vera hêrişanê dagîrkerîyan de bêveng nêmanî û vernîya qirkerdişan bigîrî. Çalakîyan de posterê Rayberê Şarê Kurdî Abdullah Ocalanî, beyraqê PKK, YPG û YPJyî ameyî akerdene.
Ewro Kurdan rê siba ma rê
Çalakîya ke Kibris de ameyî viraştene de çalakgêran dîyar kerd ke 45 serrî verê bi nameyê Tevgerê Aştîye yê Tirkîya de operasyonêk amebi kerdene û o wext zaf dejê girdî ameybî cuyayene. Çalakgêran da zanayene ke ewro çîyê ke Kurdan rê yenî kerdene, do siba înan rê zî bibo û waşt ke gerek herkes pêro pîya vera hêrişan de bivindero.
BRUKSEL