Vera sîstemê bedilnayîşo ke bi ortaxîya MHP û AKPyî de beno de cepheyê ‘nê’yî hîra beno. Bajarî do netîceyê referandûmî dîyar bikerî. Nê bajaran ra yewe zî Antalya ya. Qezaya Elmali ya Antalya de xebatê nê bê mabên domîyenê. Babete ser o Yakup Yildirim (35), Hulya Çetînkaya (30), mamostayê teqawitkerde Abdurrahman Yamak (60) û Hamdîye Yucele qisey kerdî.
Yildirimî qiseykerdişê xo de wina va: “Eke referandûmî ra ya bivejîyo do cuya domanan bikewa tehluke. Cok ra ez vana nê. Hukmat heta nika seba ma çîyêk daxî nêkerdo.”Çetînkayaye qiseykerdişê xo de bale ante muhîmîya referandûmî ser û wina va: “Ma nêwazenî kesêk bibo lîder û heme selahîyetî bidîyî kesêk. Ma padişahîya osmanîyan ra vanê nê.”
Dîktator û padîşahî
Yamakî qiseykerdişê xo de va ‘nê û ya bîyî di lete’ û wina dewam kerd: “Ez seba ameyoxa Tirkîya û domanan vana nê. Ganî heme kesî şêrî sindoqan ser û vajî nê. Eke sindoqan ra netîceyê ya bivejîyo do dîktatorî û padişahî welat de hakim bibo. Ganî ma sindoqan de menfeatê Tirkîya nê yê domanan bifikirî."Yucele zî derheqê referandûmî de wina va: “Ez seba vindarnayîşê qetilkerdişê cinîyan, çinkerdişê tacîz û tecawizî vana nê. Ganî ma referandûm de îstîsmarbîyayîşê domanan, cezanêkerdişê qatilan rê vajê nê.
ANTALYA