Teşrîna peyêne ya 2016 de bi Qerarnameyê Hukmê Qanûnî de Komeleya Piştîdayîşê Keyeyanê Hepsîyan (TUAD) amebî padayîş û hemserekê komele Arîf Yilmaz zî hetê mehkeme ra bi îdîaya ‘propagandaya rêxistine kerdene’ ra amebî tewqîfkerdiş û erşawîyabî Hepisxaneyê Hûmara 5î ya Sîlîvrî. Yilmazo ke verê cû doza KCKyî ra 3 serran hepis de mendbî, na rey zî 1 aşme hepis de mend û dima ra ame tehlîyekerdiş. 

Arîf Yilmazî derheqê neheqîyê ke hepisxaneyî de ameyî/yenî kerdiş de qisey kerd.  

Yilmazî va ‘neheqîyê ke hepisxaneyan de benî badê ke ‘prosesê çareserî’ qedîya, zêde bîyî’ û qiseykerdişê xo wina domna: “Her tewir tedayî erzîyayî dewre; mesela wextê surgunkerdişî de neheqîyê girdî ameyî cuyayîş û hîna zî yenî cuyayîş. Hepsîyî wexto ke yew hepisxaneyî ra surgunê hepisxaneyêko bîn benî, bi hawayo rut yenî sehnayîş û yenî derbkerdiş. No bêîstîsna heme hepisxaneyan de esto.”

Derb û îşkenceyî

Yilmazî dewamê qiseykerdişê xo de bale ant zêdebîyayîşê surgunan û qiseykerdişê xo wina domna: “Demo peynî de hepsîyêk mîyanê 5-6 aşman de çend reyan yeno surgunkerdiş. Bi seyan hetta bi hezaran hepsîyê ke 2-3 reyan ameyî surgunkerdiş, estî. Dewlete nêzana ke hepsîyanê sîyasîyan bierzo kura. Wextê surgunan de bi hawayo cîddî derb û îşkence esto. Verê cû pêvînayîşo akerdeyo ke aşme de reyêk ameyêne viraştiş, nika 2 aşmî de reyêk yeno viraştiş. Telefon 2 hewteyî de reyêk yeno kerdiş. Verê hepisxaneyan de waro ortax estbî, la nika zaf hepisxaneyan de no heq nêdîyeno hepsîyan. Pêvînayîşan ra bigire, heta destronayîşê mektuban, xeylê neheqîyî yenî cuyayîş.”

Polîtîkayê Îmralî

Yilmaz peynîya qiseykerdişê xo de va ‘Hûmara 9î ya Sîlîvrî de polîtîkayêko taybet dewre de yo’ û qiseykerdişê xo wina qedêna: “Hepisxane goreyê tîpa Fyî ameyo viraştiş û hucreyê 2 kesî û 3 kesî estî. Saetê pêvînayîşê hepsî û avûkatan yeno astengkerdiş. Hepisxaneyê bînan de pêvînayîşê avûkatî heta saet 24:00 domîyeno, la Hûmara 9î ya Sîlîvrî de wina nîyo. Ewja de senî ke roje û saetê pêvînayîşê keyeyan estî, roje û saetê pêvînayîşê avûkatan zî esto. No zî sey polîtîkaya taybetin ke Îmrali de yena meşnayîş o.”

Yilmazî tewr peynî bale ant Hûmar 5î ya Sîlîvrî ke o bi xo tede mendbî û va ‘ewja de zaf hûmarî de hepsîyê nêweşî estî û tedawîya nê hepsîyanê nêweşan nîno kerdiş.’ 


 DÎHABER / STENBOL