Hemserekê Kobanê yê TEV-DEMî Ehmed Şêxoyî 1ê teşrîna peyêne Roja Kobanê ya Dinya ser o va ‘Kobanê tarîx de rîpelêko newe yê xoverdayîşî akerd’ û wina domna: “Kobanê heme ca de bîye hêvî. Cok ra 1ê teşrîna peyêne Roja Kobanê ya Dinya ame îlankerdene. Wa na roje şerwan û şarê ma rê pîroz bo.”
Çeteyanê DAIŞî 15ê êlula 2014î de hêrişê Kobanê kerdî û ewja de bi xoverdayîşêk reyde têrî mendî. Kobanêyijî bi sîlehanê şexsîyan vera çeteyê ke destê înan de sîlehê giranî estbî de xoverdayîşêko gird nîşan dayî û heme dinya heyran mende. Cok ra 1ê teşrîna peyêne sey Roja Kobanê ya Dinya ameye qebulkerdene û emser serrgêra 4. ya na rojî ya.
Babete ser o Hemserekê Kobanê yê TEV-DEMî Ehmed Şêxo û nuştox Kameran Gulpîyî qisey kerdî û qala muhîmîya na roje kerdî. Şêxoyî va ‘seba ke Kobanê hem mabênê Cizîr û Efrîn de cayêko stratejîk bîye hem zî kila şorişî ewil ewja de veşaybî, Kobanê ame hedefgirewtene’ û wina domna: “Ma bi îmkananê kêman dest bi xoverdayîşî kerd. Ti kesî hêvî nêkerdêne ke Kobanê do hende xover bido. Çeteyan Mûsil û Kerkûk çend saetan de girewtbî, labelê Kobanê de îradeyêk estbî. Xoverdayîş bi fedaîtîya 13 şerwanan dewa Şerzorî de dest pêkerd.”
Şêxoyî dewamê qiseykerdişê xo de wina va: “Xoverdayîşêko winasî ame nîşandayene ke êdî dinya nêşêna bêveng bimana. Xeylê cayan de seba Kobanê weriştî payan ser. Hêzê mîyanneteweyî bêveng nêmendî û beşdarê prosesî bîyî. Êdî wina bi ke şer mabênê çete û kurdan de nê, mabênê merdimî û teberê merdimîye de bîyêne. Cok ra şarê dinya wayîrê nê xoverdayîşî vejîyayî û 1ê teşrîna peyêne sey Roja Kobanê ya Dinya ame îlan kerdene.”
Kobanê heme ca de bîye hêvî
Şêxoyî va ‘1ê teşrîna peyêne ra dima Kobanê de xoverdayîş bihêz bi. Labelê hêrişî zî zêde bîyî. Heta o wext çeteyan hîrê hetan ra hêriş kerdênê. Labelê Erdoganî destûr da çeteyan û çeteyan Tirkîya ra zî hêriş kerdî. O wext vejîya orte ke kam destek dano çeteyan. Labelê heme hêrişî veng ameyî vetene. Êdî Kobanê heme ca de bîye hêvî. Herkes dormeyê Kobanê de ame têhet. Eke ewro DAIŞ Sûrîye de binkeweno, destpêkê ci Kobanê yo. Wa na roje heme şerwan û şarê ma rê pîroz bo.”
Nasnameyê kurdan a
Nuştox Kameran Gulpîyî dîyar kerd ke wexto ke Rayberê Şarê Kurdî Abdullah Ocalan şi Rojawanê Kurdîstanî, ewil şi Kobanê û wina domna: “Tesîrê Rayberê Şarê Kurdî xoverdayîşê Kobanê de zaf bi. Senî ke Helebçe de kurdî hêrişê kîmyewî ra dima ameyî naskerdene, Kobanê de zî kurdî cesaretê xo reyde ameyî naskerdene.”
Gulpîyî qiseykerdişê xo de qala cîyayîya Rojawan û Başûrî kerd û wina va: “Başûrê Kurdîstanî de hêzê sîyasî sivîlan kenî qurbanê menfîetanê xo. Labelê Kobanê de sivîlî qet nêkewtî destê çeteyan. Îdareyê Xoserîya Demokratîke destûr nêda ke kes bikewo destê çeteyan. Kobanê nasnameyê kurdan a. Kobanê de xoverdayîşê seserran ame cuyayene. Kobanê xoverdayîşê kurdan bi dinya da naskerdene. Hêzê YPG Û YPJyî bi îradeya xo hêrişanê çeteyan veng vetî. Ewro saya înan de sîstemê xoserîye aver şono.”
Ewro zî lazimîye bi ê ruhî esta
Gulpîyî qiseykerdişê xo wina qedêna: “Ewro zî sey çar serrê verê, lazimîye bi ruhê xoverdayîşê Kobanê esta. Ganî ma Roja Kobanê ya Dinya de ruhê yewîya kurdan biwazî. Reyna ganî ma xo bi hawayo parçe mendişî ra, fikranê tengan ra bixelisnî û vengê kurdan dinya de bidî eşnawitene.”
MERKEZÊ XEBERAN
Hêrişan de sivîlî birîndar bîyî
Artêşa tirkî serrgêra 1ê teşrîna peyêne Roja Kobanê ya Dinya de hêrişê Kobanê kerd. Artêşa tirkî bi topan hêrişê dewanê Aşmê û Kor Elî ya Kobanê hedef girewtî. Goreyê melumatê ke ajansê ANHA de derbaz bîyî, netîceyê hêrişan de 2 sivîlî birîndar bîyî. Artêşa tirkî vera dewanê rojawanî yê Kobanê de eştişê topan domnena. Şerwananê HSDyî vera hêrişan de wesayîtêko zirxin hedef girewt û wesayît temamî îmha bi.
KOBANÊ