Hemverfekê Kongreya Demokratîke ya Şaran Sedat Şenoglûyî bale ante tecrîdê ser Ocalanî û wina va: “Tecrîd ancax bi têkoşîno ke seba aştî, demokrasî û azadîye yeno dayene, eşkeno bêro wedarnayene. No têkoşîn do dîyar bikero ke Ocalan eşkeno rolê xo kay bikero an nê. Têkoşînê şaran eşkeno beranê Îmrali akero.”

Rayberê Şarê Kurdî Abdullah Ocalan tewr peynî 18ê Hezîrane de avûkatanê xo reyde pêvînayîş kerdbi û o tarîx ra nata Ocalanî ser o tecrîdêk yeno bicaardene. Hemverfekê Kongreya Demokratîke ya Şaran Sedat Şenoglûyî dîyar kerd ke 8 serran ra pey pêvînayîşî amebî viraştene û ê pêvînayîşî bîbî sebeb ke şar hetê aştî û demokrasî de newe ra hêvîdar bibo.

Şenoglûyî qiseykerdişê xo de vatişanê Ocalanî yê ‘nê pêvînayîşî nînî manaya muzakere yan zî destpêkê prosesêko newe’ û ‘Ancax 30-40 rojan ra pey dîyar beno ke no proses kamcîn het ra şono’ da vîr û wina va: “Hende wext derbaz bi û yeno dîyayene ke etirîyayîşê Ocalanî çiqas raşt o. Rejîmê yew merdimî keno ke hewldayîşê aştî û demokrasî yê Ocalanî veng vejo. Çimkî îqtîdar çi eşkeno tecrîdî wedarno, çi zî eşkeno îradeya çareserîya probleman nîşan bido.”

Şenoglûyî dîyar kerd ke blokê AKP, MHP û Ergenekonî seba aştîye îrade nîşan nêdano û wina va: “Tirkîya de ancax no îqtîdar şêro, blokê aştî û demokrasî eşkeno awan bibo. Xora Birêz Ocalanî vatbi ‘Ez çîyê ke kewenê milê mi ser o kena, labelê ganî herkes berpirsîyarî bigîro’. Dewlete fek kayanê xo ra veranêdana. Wexto ke pêvînayîşî birîyenî, donemê tarî dest pêkenî. Polîtîkayê şerî kûr benî. 40 serrî yo ke hewl dîyeno nê polîtîkayanê şerî ra encam bigîrî. Rejîm nêşêno bi zor û tedayan problem werte ra wedarno. Nê polîtîkayî ecizîya îqtîdarî nîşan danî.”

Muxatab Birêz Ocalan o

Şenoglûyî qiseykerdişê xo de va ‘Çareserîya problemê Kurdan de muxatab Birêz Ocalan o’ û wina domna: “No bi îradeya azade ya şarê Kurdî ameyo dîyarkerdene. Ganî ma na raştîye bivînî. Seba ke Ocalan bişînbo fikir û pêşnîyazanê xo bido, ganî bi hawayo azade rolê xo kay bikero. Verê cû serranê 2013 û 2015 de bi. Zafaneyê komelî bi hawayo baş nizdîyê fikir û pêşnîyazanê Ocalanî bi. Wexto ke Ocalanî fikir û pêşnîyazanê xo kerdêne, vatişê şovenîstî xeylê kêmî bî.”

Têkoşînê şaran do dîyar bikero

Şenoglûyî peynîya qiseykerdişê xo de wina va: “Tecrîdê Îmrali tena hetê rejîmê Tirkîya ra nê, hetê konseptêkê mîyanneteweyî ra yeno rayraberdene. Fikirê Rojawanî seba heme dewletanê serdestan sey tehdîdî yenî dîyayene. Çîyêko winasî çin o. Hêzê çareserîya Ocalanî eynî wext de hêzo ke vera hêzanê serdestan de yeno dayene. Coka şertê Birêz Ocalanî nînî rastkerdene. 2015 de deklarasyonêko ke 10 madeyan ra pê yeno amebi amadekerdene. Labelê hetê dewlete ra masa ameye qelibnayene. Çira? Çimkî eke çareserî bibîyêne, o wext do dengeyê dewletanê serdestan xirab bîyêne. Seba ke Ocalan çareserî pêşnîyaz keno, yeno tecrîdkerdene. Coka ma vanî ke wa hêzê ke aştî, demokrasî û azadî wazenî, wa rolê xo kay bikerî. Tecrîd ancax bi têkoşîno ke seba aştî, demokrasî û azadîye yeno dayene eşkeno bêro wedarnayene. No têkoşîn do dîyar bikero ke Ocalan eşkeno rolê xo kay bikero an nê. Têkoşînê şaran eşkeno beranê Îmrali akero.”

AMED

Ganî rol û mîsyonê Birêz Ocalanî bivînê

Parlamenterê HDP’yî Omer Ocalan pêvînayîşê peyênî yê Ocalanî û tecrîd ercnayî. Ocalanî derheqê redkerdişê waştişanê pêvînayîşanê Ocalanî de wina va: “Nizdbîyayîşêko bi nê hawayî yê vera Birêz Ocalanî de ne feyde dano şarê Kurdî ne zî feyde dano şarê Tirkî. Problemê Kurdan pîl o. Blokê Tirkîya cîya asenê gama ke babete bena Kurdî heme benê yew. Ma înan ra çîyêk nêpawenî. Yê ke ma behsê înan kenê sosyal demokrat, akademîsyen, femînîst û roşinvîrê ke xo xeta hîrêyine de şinase kenê û nizdîyê xeta hîrêyine yê. Ganî ê Birêz Ocalanî bigîrî rojeva xo û sey muzakerekarêko sereke yê nê problemî qebul bikerê. Seba ke şer bêro astengkerdene ganî roşinvîrî rol û mîsyonê Birêz Ocalanî bivînê û çalakîyan bikerê.”