15ê sibate de mînîbusa ke ver bi merkezê qezaya Licê ya Amedî şîyêne, hetê leşkeran ra rastê hêrişî ameybî. Netîceyê hêrişî de mînîbusa ke 10 kesî tede estbîy de bi hawayo tesadufî kes nêmerdbî û tena kesêk bi hawayo sivik birîndar bîbî.
Baroya Amedî babete ser o derheqê leşkeran de bi îdîayê ‘teşebusê kiştişî’, ‘zirardayîşê mal û milkî’ û ‘wezîfeyê xo hetê xirabî de xebetnayîş’ ra gerre kerde. Labelê Serdozgerîya Komare ya Amedî babete ser o qerarêko skandal daye û va ‘lazimî bi tehqîqatî çin a’. Serdozgerî qerarê xo de îdîa kerde ke ‘îxtîmal esto ke guleyî hetê PKKyîyan ra ameyî panayîş’. Babete ser o avukatanê Baroya Amedî ra Aydin Ozdemîr û şofor Burhan Yîgîterî qisey kerdî.Ozdemîrî va ‘her çiqas ke mexdûr û şahidê hedîseyî vanî leşkeran hêriş kerdo, reyna zî dozgerî vana PKKyî hêriş kerdo’ û wina dewam kerd: “Çi heyf ke bi no hawa hewl danî zirxê destpironêginayîşî bidî leşker û polîsan. Herême bin kontrolê leşkeran de ya û îdîayêka winasî bêbingeh a. Hedîse ra dima welatîyê ke mîyanê mînîbuse de yî muracatê qereqolê Duru Bekîrhanî kerdî û ewja de personelî înan ra vato ‘eke şima terorîstan nêkirişî, wina nêbeno’. Derheqê hedîse û nê personelî de qerarê bêtaqîbî ame dayîş. Na bêhuqûqîyêka girde ya.”
Lejker: Bi şaşî bîyo
Hedîse ra dima şoforê mînîbuse Burhan Yîgîter şîbî qereqol û hetê leşkeran ra amebî tehdîtkerdiş. Yîgîterî va ‘o wext leşkeran ma ra vatbî; şima terorîstan kirişenî û ma tîya ra berdbî Fermandarîya Cendirmeyan ya Qeza’ û wina dewam kerd: “Serdozgerê qeza û Fermandarê Cendirmeyan ameyî hetê ma. Leşkerî va ‘sîleh bi şaşî panîyayo, rewşa ke destê mi de nêbîye, wina bîyo’. Dest ronayî mînîbuse ser de û hesaban ra seba cigêrayîşî berdî Amed.”
DÎHABER/AMED