Seba xelesnayişê Musilî hadreyînî ramiyenê. Fermandarê YBŞ Mazlûm Şengalî da zonayen ke YBŞ do çarçoveyê qanûnan de operasyonê xelesnayişê Musilî de ca bigîro. Şengalî vist vîrî ke Tirkîye hewl dana ke operasyonî pûç vejero.
Goreyê tayî spekulasyonan operasyon do wextekê kilmek de destpa bikero. La hona zelal nêbîyo ke kamcî quwetî dê operasyonî de ca bigîrê û xelesnayişê sûk ra dima statu û qederê sûk do sebo, hona dîyar nîyo. Operasyonê Mûsil do bi xo ra kamcî netîceyanê sîyasî û lejkerî bîyaro. Seba sûk sîstemekê senî yeno fikirayiş? Tirkîye çima operasyonî de ca girotişî de hendayî israr kena? PDK bi Tirkîye ra ser kamcî esasan de îtifaq kena?
Fermandarê YBŞ Mazlûm Şengalî derheqê operasyonê Musilî de cewab da persanê Ajansa Xeberan yê Dîcle. Şengalî ard ser zon ke hadreyînê operasyonê Musil ramenê û vist vîrî ke yeno pawiten ke zerreyê çend rojan de operasyon destpa bikero. Şengalî dîyar kerd ke Tirkîye wazena vernîya nê hadreyînan û operasyonî bigîro.
Wayîrê qerarî şarê heremî yê
Ser persa ‘YBŞ do operasyonê xelesnayişê Musilî de ca bigîro ya zî nê?’ de Fermandarê YBŞ Mazlûm Şengalî wina va: “Quwetê ma çarçoveyê qanûnan de hadreyînanê xo ramenê. Goreyê waştena hikûmeta navendî ma dê zî hereket bikerê. Eke ê biwazê, ma hadreyê ke operasyonî de ca bigîrê. Heremê ke ma zî keşîf kerdîyê estê, ma dê zî ê cayan bixelesnê. Ser no esasî ma dê operasyonî de ca bigîrê.”
Şengalî da zonayen ke operasyonê Musil hadreyînanê lejkerî ra vêşêr, menfeatanê sîyasî ser o yeno ramiten. Fermandarê YBŞ vist vîrî ke nê menfeatî tesîrê şaranê heremî kenê û va yê ke zerar vînenê şarê mintiqe yê. Şengalî ard ser ziwan ke wayîrê esil yê na heremî şarê heremî yê, yê ke wayîrê qerarî zî şarê heremî yê. Şengalî vist vîrî ke operasyonê Musil ke bireso serkewtişî do hetê şarê herem bîro ramiten. No zî do virado ke ronayişê ameyişê Musil û Irakî çarçoveyê netewa demokratîk de bibo.
Perspektîfê netewa demokratîk
Fermandarê YBŞ Mazlûm Şengalî hayr ant netîceyanê operasyonî de ca girotişê quwetanê YBŞ ser û cewab da sebebê nêwaştişê operasyonî de ca girotişê YBŞ yê Tirkîye û PDK. Şengalî da zonayen ke operasyonî de pêro pîya ca girotişê şaranê Musilî do raya pîyaciwyayişê şaran zî akero û wina va: “Pêrokîn şarî dê ameyişa wertax û netewa demokratîk înşa bikerê. Nêwaştişê operasyonî de ca girotişê quwetanê ma, yeno maneya mavêna şaran de xorînkerdişê dişmenîye yo. Meseleya winayîn do meseleyanê bîn xorîn bikero. Emelê Tirkîye ya ke wazena bi zihnîyetê ’jû dewlet, jû mîllet’ tewrê operasyonî bibo bêheq ternayişê (viradayişê) şaran o. Ser tewrnêbîyayişê ma zî, pey perdeyan de bingeyê nayî kena hadre.” Mazlûm Şengalî da zonayen ke yê ke behsê operasyonê Musilî kenê, qe behsê projeyê seba şaranê heremî nêkenê û aşkere kerd ke ganî operasyonê xelesnayişî ra pîya, statuyê sûk û sîstemê îdare yê şaran zî bîro zelalkerden.
Tirkîye rolekê taloke kay kena
Şengalî hayr ant pozîsyonê Tirkîye yê Irakî ser û va, ‘Tirkîye Başîka de çormeyê tayî koman de are bîya. Nê çeteyî jû wext zerreyê DAIŞ de ca girotî û pîya hereket kerdî. Nê koman are kerdîyê û jû arteş viraştîyê. Çîyo ke Cerablûs de bi, tîya de zî beno, wazenê Musilî de zî eynî çîyî bikerê.’
Şengalî da zonayen ke israrê operasyonî de ca girotişê Tirkîye rîwalê îşgalî yo û va, Tirkîye sînoranê Mîsaq-î Mîllî de israr kena û wazena bigîro bin qontrolê xo. Şengalî vist vîrî ke dekewtişê Tirkîye yê Musil do emrê DAIŞ derg bikero û va, bi no operasyonî AKP wazena îmaj û prestîjê lejker û artêşa tirk bixelesno.
Derheqê pîyakarîya PDK û Tirkîye de zî Şengalî wina qisey kerd: “Îtifaqê înan ser îşgalkerdişê Musilî yo. Wazenê herbê mezhebî xorîn bikerê û şaranê herem bipelexnê. Erdogan zî ser munaqeşeyê Sûnnîcitî nayî keno. Hardê Kurdistan mavêna çar dewletan de lete û bare bîyê. Tenya yew cayo ke kurdî wayrê heqîyê Irak o. Tirkîye wazena heyfê nayî bigîro.”
‘Tirkîye wazena vernîya operasyonî bigîro’
Mazlûm Şengalî vist vîrî ke mintiqeya Başîka hardê şarê Êzidîyanê û va, ma dê bîyayişê Tirkîye ewja de qebûl nêkerê. Şengalî da zonayen ke Tirkîye bi destegê PDK Başîka de bi ca bî û va, ‘pey pêrokîn fermananê şarê Êzidîyan de gişta Tirkîye esta. Ardişê na dişmenî ser hardê ma, şar zî qebûl nêkeno.
DÎHA / ŞENGAL