Vera tayînbîyayîşê qayûm û xespbîyayîşê şaredarîyanê Amed, Wan û Mêrdînî de HDPyî qerarê ‘Bêmabên çalakîye’ girewtbî. Çarçewaya çalakîyan de bi rojan o ke 3 bajaran de çalakîyî yenî viraştene. Xeylê sîyasetmedar, hunermend û roşnvîrî zî destek danî çalakîyan.
Parlamentera HDPyî ya Stenbolî Dilşat Canbaze çalakîye de qisey kerde. Canbaze va ‘ganî hetê Tirkîya ra zî vera qayûman de reaksîyonî bêrî’ û wina domnaye: “Çimkî qayûm tayînê hetê Tirkîya zî bîyî. Weçînayîşê Stenbolî bi îradeya Kurdan ame qezençkerdene. Cok ra nika Kurdan bi no hawa ceza kenî.”
Canbaze dewamê qiseykerdişê xo de amancê tayînkerdişê qayûman ser o vindete û wina va: “Hukmatê AKPyî hewl dano bi qayûman şaranê Tirkîya tecrîd bikero. Eke şima Kurd bî, xora heqê şima yê cuyayîşî çin o. Cepheyê Tirkîya xora yeno bêvengkerdene. Ma ewro ziqaqan de yî, destê ma de kerra û sewbîna çin a. Ma hewl danî vengê xo vejî, labelê ê dormeyê ma girewto û wazenî ma tecrîd bikerî. Îqtîdar her ke zeyîf beno, hêriş keno. Ewro ganî herkes wayîrê Amed, Wan û Mêrdînî bivejîyo. Çimkî beno ke siba vera hemînan de bidî destpêkerdene. Eke ma bibî yew, ma eşkenî bibedilnî.”
Eke cewab nêdîyo, do heme cayan de bibo
Serekê Şaredarîya Dêrsimî Fatîh Mehmet Maçogluyo ke beşdarê çalakîya roniştişî bi, va ‘ganî ma bi hawayo lez vera qayûman de bivinderî, neke do bibo problemê heme partîyan’ û wina dewam kerd: “Ganî îradeya Amedî bêro qebulkerdene û na neheqîye peyser bigîrîyo. Ma Dêrsim de bî zî zerrîya ma tîya de ya. Ma seba ke destek bidî ameyî tîya. Ma çend rojî verê Koyanê Kazî de bîy. Ganî heme dezgehê demokrasîyî yê Tirkîya vera na neheqîye de vengê xo vejî û wa destek bidî HDP. Eke ewro cewab nêdîyo, siba to her ca de wina bikerî.”