Ez wazena to rê nameyêk binusnî. La senî dest pêbikerî nêzanena. Çi vajî? Ya raste çîyê ke vajî zaf ê la se vajî? Kamcî çekuyî bese kenê? Ma çekûyî bese bikerê ke ez to rê çîyanê zerrîya xo, çîyanê mezgê xo vajî?
Rindeka welatê mi, vilika koyanê Kurdistanî, ti zanena înan çira ti kerda hedef sereyê to de na to ra; çike to qefçiliya înan antênê. To qefçiliya înan musnayênê dinyaye. Vilika Baxçeya zerrîya mi, porxelaka mi, mi zaf bêriya to kerdo. Ez roje be roje rewşa to şopnena. Tenê ez nê, pêro embazî şopnenê. Ma pawayê to yê. Ma pawayê to yê ke ti vîstêk verê weş bê, bêrê mîyanê ma.
Halê ma zaf rind o. Ti qet xeman mewe vilika rindek e. Şengal verî ra rindêr o nika. Ti zanena bi nê êrîşî xeta xayîn, hemkar û netewpereste reyna binkewte. Xeta xoverrodayîş û azadiye bîye xurt. Şengal de royê Apogerî bî xurt. Hesabê erdoxan, barzanî û hevalbendanê înan pûç vecîya. Înan hesab kerdbî ke Şengalî zaf rehet bigêrê, Şengal ra êrîşê Rojava bikerî. Înan hesab kerdbî ke bi kemerêk di çûçikan bikîşê la hînî nêbî. Kemera înan çerexîye înan ginaye keçelê înan ra.
To bîdîyênê û bi kameraya xo ê dîmenî bêpênî bikerdênê. Dîmenê merasîmê şehîdan, tawo ke şarê Rojava ame Şengal, dîmenê dayikan ê serê xendekan, dîmanê Şengalijan ê Berê Kerse û hîna zaf dîmenî. Merex meke vilê hevalanê to, şagirtanê to ê dîmenî guretî. Tawo ke ti bîya weş reyna ameya Şengal ti do bivînê. Dîmenê muthîş bî. Her ca de royê Apogerî bî. Hende weş bî, hende weş bî ke. Dayikanê Şengalî bejna çeteyanê erdoxan û barzanî sencnê. Musna înan ke zerrîya înan çend pere ya. To bidîyênê ê dayîkî çiqas cesur bî, çiqas hewl bî. Dişmen hemverê înan de binkewt.
Şarê qampa Newroze waşt bêrê Şengal, la kelpanê (haşa kelpa rê) erdoxanî û barzanî nêverda. La înan kî dersade weşe daye ê kelpan, musna înan ke êdî komelê Êzidî hînî loqmeyode rehet nîyo. Tenê şarê qampa Newroze, şarê Rojava nê, pêro Kurdistanî û şarê ke hîna zerrîya xo bi merdimiye dana piro wuştî ra, pîşta komelê Şengalî gurete. Tarîxê Êzidîyan de bi taybet ê Şengalijan de herhal na reya yewin a ke hende şar dostanîya Êzidîyan keno. Pîşta Êzidîyan gêno. No zaf weşa Şengalijan şî. Şengalijan zaf moral guret. Şengalijan hîs kerd ke ê tenê nîyê. Şengalijî êdî bi nê hêzî hînî rehet xoserîya xo awan bikerê. Hawt şêhîdê nê êrîşî, no êrîşo ke bi destê kermê dare virazîya do bibê vesîleya hînî bi awayode xurt awanbîyayîşê xoserîya Şengalî, bîbê yewîya Kurdistan û Şengalî.
Pênîya nameya xo de ez lew nana sirotanê to yê sûran, çimanê to yê şalênan û to virar kena. Ha verê ke ez xo vîra bikerî, mi seba to vilî nayê ro. Ez, ê vilî, pêro embazî û Şengal pawayê to me. Wisarê Şengalî pawayê to yo. Ti do gereke bi kameraya xo wisarê Şengalî biancê.
Zaf, zaf rind qaytê xo bike. Rew weş be û bê.