RIZGAR AMED / SERHAT ARARAT / ANF / BEHDÎNAN
Tevgerê Azadîya Kurd roja ronîyayîşî ra nata hertim erjê merdimîye esas girewto. Tena seba şarê kurdî nê seba têkoşînê heme şaran destek dayo. Nizdîyê 40 serran xeta enternasyonalîzmî esas girewto. Bitaybetî nê serranê peyênan de her hetan ra şerwanî vera xo dayî têkoşînî mîyan.
Nê gerîlayan ra yewe zî Karwan Cudîyo norveçij o. Karwan Cudî 26 serre yo û nika koyanê Kurdistanî de vera dewleta tirkî de têkoşîn dano. Cudîyî derheqê beşdarbîyayîşê xo de qisey kerd.
Cudîyî va ‘nameyê mi Karwan Cudî yo û ez Norveç ra ya’ û wina dewam kerd: “Ez çendêkê verî seba ke vera artêşa tirkî ya faşîste de têkoşîn bida, ameya tîya. Çira ez beşdarê PKKyî bîya? Cewabê nê persî aşkere yo. Çimkî çîyo tewr raşt no bî. PKK bi fikrê Rayber Apoyî awan bîyo û seba merdimîye şer keno.”
Merdimî qiseykerdişê ziwanî ra tersenî
Cudîyî qala qedexeyê qiseykerdişê ziwanê dayîke kerd û wina va: “Dewleta tirk sere ra nata hertim heqê kurdî yê musayîşê tarîxê xo înkar kerdo. Cok ra yê ke keyeyê xo de daxî qiseykerdişê ziwanê xo ra tersenî, estî. Gelo no yeno qebulkerdiş? Nê. Heqê herkesî esto ke bizano kura ra ameyo. Ganî herkes bişênbo bi ziwanê xo qisey bikero. MÎT, seba ke keyeyan de kamcîn ziwan yeno qiseykerdiş bizano, taqîp keno. Ganî merdimî qiseykerdişê ziwanê xo ra nêtersî û na rewşe qebul nêkerî.”
Seba azadîye beşdarê PKKyî bibê
Cudîyî peynîya qiseykerdişê xo de wina va: “Seba heme kesê ke Ewropa de cuyenî mesajêkî mi esto. Eke şima wazenî seba azadîya rastikêne û seba azadîya cinîyan şer bikerî, beşdarê PKKyî bibê. Vera xo bidê koyan û beşdarê gerîla bibê. PKK 40 serrî yo ke estena xo paweno û ti dewlete nêşêna PKK parçe bikero. Şima zî beşdarê şorişî bibê û şorişî vila bikerê. Heme hetê Ewropa de vengê ma bidê eşnawitiş û bêveng memanê. Reyna çalakîyan bivirazê. Çimkî sucê ke hetê dewleta tirkî ra yenî kerdiş, nînî qebulkerdiş. Ganî herkes azadîya Rayber Apoyî biwazo.”