Zext û tedayê ke zîndananê Kurdistan û Tirkîya de estî, domîyenî. Bitaybetî îlanbîyayîşê OHALî ra dima nê zext û tedayî resayî dûştêko berz. Bitaybetî nê zext û tedayî şexsê tayê zîndanan de hîna zaf yenî rojeve. Nê zîndanan ra yewe zî Zîndanê Tîpa Tyî yê Tarsusî yo.
Seke yeno zanayîş Zîndanê Tarsusî de cinîyê hepsîyî verê cû dest bi grevê vêşanîye kerdbî û tewr peynî zî pêvînayîşo akerde bi hawayo kêfî amebî astengkerdiş. Keyeyê ke bajaranê cîya-cîyayan ra seba dîyayîşê merdimanê xo ameybî rê pêvînayîş rê çend deqayî mendbî, ame vatiş ke ‘pêvînayîşo akerde ame betalkerdiş, eke şima wazenî 15 deqa pêvînayîşo padaye bikerê’.
Vera na rewşe de keyeyê ke dure ra ameybî, reaksîyon nîşan dayî û keyeyan dîyar kerdî ke ê bi aşman o seba dîyayîşê merdimanê xo vindetênê û waştî ke wa vengê înan bêro eşnawitiş.
Domanê ma binê zextêko gird de yî
Merdimê hepsîyan vatî ‘wa fek kerdişanê kêfîyan ra vera bidî’ û wina dewam kerdî: “Şert û mercî her ke şono hîna xirabêr benî. Ma zaf tersenî ke înan rê çîyêk bibo. Ma bi aşman o ke paweyê nê pêvînayîşî bî, labelê ma nêşêna merdimanê xo bivînî. No zulm do heta key bidomîyo? Heqê domananê ma yeno xespkerdiş. Ganî ma vera na neheqîye de veng bivejî. Wa ti kes vera nê neheqîyan de bêveng nêmano.”
Heto bîn ra keyeyê hepsîyo bi nameyê H.Myî ke Zîndanê Tîpa Tyî yê Denîzlî de maneno, dîyar kerdî ke domanê înan 4 aşmî yo ke hucre de maneno û wina vatî: “10 rojî yo ke grevê vêşanî de yo. Dejê ci estî labelê tedawîya ci nîna kerdiş.” n JINNEWS/MÊRSÎN