Xebatkarên çapemeniya Kurd, nûnerên rêxistinên sivîl ên civakî, rêveberên BDP'ê, KURDÎ-DER û gelek kesên din tevlî daxuyaniyê bûn. Di daxuyaniyê de dowîzên "Çapemeniya azad Parîs ronî kir" û "Em tu dem ji rastiyan tewîzan nadin" hatin vekirin û rojnameyên Azadiya Welat û Ozgur Gundemê hatin hilgirtin. Li ser navê xebatkarên çapemeniya azad Edîtorê Rojnameya Azadiya Welat Ramazan Olçen daxuyanî xwend. Olçen, diyar kir ku sibê li Stenbol li Silîvriyê wijdanên gel ango hevalên wan ên rojnameger wê werin darizandin. Olçen, anî ziman ku her çend navê wê wekî darizandin be gotin jî bê şik û guman e ku ew di destê dewleta AKP'ê de dîl girtî ne û wiha got: "Tirkiye di mijara girtina rojnamegeran de li cîhanê yekemîn e û ji sedî zêdetir hevalên me yên rojnameger girtî ne. Di 20'ê kanûna 2011'an de polîsên girêdayî Wezareta Karên Hundir ên AKP'ê bi awayekî hemwext bi ser gelek sazî û dezgehên çapemeniya azad de girtin. Bi dehan hevalên me yên ku bes karê wan ew bû ku li hemberî hemû desthilatdariyan li cem gelê xwe bin û gelê xwe ji geşedan û bûyeran agahdar bikin hatin binçavkirin û girtin. Ev 13 meh in ku hevalên me bi awayekî diji hiqûqî girtî ne."


'Binçavkirin û girtin me natirsin e'
Olçen, da zanîn ku çawa çapemeniya azad di salên 1990'an de ji windakirin û kuştinan netirsiya îro jî teqez ji binçavkirin û girtinan natirse û dê her tim di riya heqîqetê de bimeşe û wiha axivî: "Ne dûr e hêj duh na pêr derket holê ku hevalê me Nazim Babaoglu ji aliyê endamên JÎTEM'a ku di esasê xwe de hêza dewleta kûr e hatiye qetilkirin. 19 sal di ser bêserûşûnkirina Nazim re derbasbû lê pênûsa Nazim li erdê nema. Îro jî em dîsa wekî xebatkarên çapemeniya azad li hemberî hemû zext û pêkutiyan, li hemberî binçavkirin û girtinan bi çeka xwe ya herî xurt bi rêxistinbûna xwe û bi baweriya ku dê rastî di tarîtiyê de nemînin li cem gel dozdarê desthilatdariyan, dozdarê zaliman, dozdarê derewan in. Belê kesên ku di salên 1990'î de bi windakirin û bi qetilkirinan xwestin ku dengê çapemeniya azad qut bikin da ku bi hêsanî bikaribin împaratoriya xwe ya tirsê li ser civakê ava bikin îro roj bi roj bi têkoşîna gel û bi têkoşîna çapemeniya azad di sergoya dîrokê de ne."
Olçen, bilêv kir ku çiqas ew li dora rastiyê bicivin û ji bo rastî derbikevin holê têbikoşin bidin ewqas dê çenda desthilatdarên ku dixwazin desthilatdariya xwe li ser derewan û li ser tarîtiyê avakirine dê têk biçin û wiha pê de çû: "Em hemû dizanin ku dê rastî her tim li hember tarîtiyê û derewan ser bikeve. Em ê sibê li ber edliyeya Sîlîvriya Stenbolê bin li wê edliyeyê ne ku bi tenê hevalên me tên darizandin, li wir di şexsê hevalên me de tê xwestin ku rastî, başî, ronahî, xweşikahî were mehkûmkirin. Em ê nehêlin ku desthilatdar bigihîjn vê mexseda xwe ya qirêj. Em ê li wir biqîrin û bibêjin ku; Îro roja xwedîderketina li têkoşerên rastiyê ye. Îro roja bilindkirina dengê rastiyê ye, Îro roja azadkirina rastiyê ye. Em bang li dewleta AKP'ê dikin ku rojnamegerên dîl hatine girtin demildest serbest bên berdan." Olçen, xest ku demilêdest rojnamegerên girtî serbest bên berdan.
Daxuyanî bi slogana "Çapemeniya azad nayê bêdengkirin" bi dawî bû. 

DÎHA/AMED