Vateyê verênan vateyê ke vîyarte ra heta roja ma yenê, tecrubayanê derg û dilayan ra kar bikero û şîretê kilm bi xo dano, hetê komelî ra qebul bîyo û bi hetê her kesî ra qalibêkî şuxulîyenê. Sey her şarî mîyanê ciwîyayîşê kurdan de zî xeylek vateyê verênan estê, la mîyane nê vateyanê verênanê ma de „heta lêl nebî zelal nêbeno“ zaf weşa mîna şina, çunke sîyasetî ye kurdan ke Tirkîya de rameno sey na vateya verênan ge lêl beno ge zelal beno la peynîye lêlî de zî tim û tim hîna zaf qewetin vejîyeno.
Prosesê têkoşinê sîyasî ye kurdan Tirkîya de bi zor û zehmetî ravîyerena, zaf wextan hetê dewlet ra sîyasetê kurdan qedexe bena, la bade cû qedexeyan ra pey bi xurtbîyayiş vejîyena û aver şina. Tarixê sîyasî ye kurdan serrane neway (90) ra destpekerd. Serra hezar û new sey û neway de bi partîya HEP kewt mîyanê sîyasetê Tirkîya. Serra hezar û new sey û neway yew de zî bi partîya SHP ra weçînayîşê pêroyîya de beşdar bî. No weçînayîşê de mîyane SHP ra vîst hebî parlamenterî HEP sindoqe de vejîya. Parlamenteranê HEP î qayil bikî bi iradeya xo, bi renge xo û bi ziwane xo miyane meclîsê de bibo. Labelê sîyaseta Tirkîya de qabûl nêbi û xeylek zorî vejîya, na ridî ra parlamenteranê HEP î SHP ra cîya bî û serra hezar û new sey û hîrê de partîya newe DEP î ra beşdar bî. Na rewşa re pe dewleta Tirkîya bexşînîyê parlamenteranê DEP î darite we û parlamenteranê DEP î tepîşîyayî û tewqîf kerdî, badê cû zî partîya DEP ame qefelnayene. Nay ra dima zî xeylek sîyasetmedare kurd kewtî nezaret û îşkence dî. Yanî sîyasete kurdan ye ke meclîsê Tirkîya de rameno o wextan de bibî „lêl.“
Badê cû heta serra hezar û new sey û neway çahar de partîya HADEP û hezar û new sey û neway hot de zî partîya DEHAP bi partîya kurdan. Labelê dewleta Tirkîya ver bi sîyaseta kurdan bî û her wext bi zorî nêwerdenî ke weçînayişan de bivejîyo heta ke serrane vîst hezaran.
Serra di hezar û panc de partîya DTP a bî û serra di hezar û new de pe namzetê xoser reyna kewt weçînayişî û vîst hebî parlamenteran erşawite meclîsê Tirkîya. Nê parlamenteran semedo heqê kurdan xeylek kar viraştî weçînayişan de zaf şaredarîyan zî girewtî labelê tehemûlê Tirkan sîyasetê kurdan ra çînîye bî reyna partîya DTP qefîlîya û parlamenterê DTP meclîs ra bi îradeya xo ancîya. Badê qefelnayişê DTP kurdan partîya newe bi nameya BDP kerd a. Kurd sehnêya sîyasetê Tirkîya de weçînayişê serra di hezar û yewendes de bi nameya blokê emeg demokrasî û azadî ra kewtî weçînayişî û hîris û şeş parlamenterî vetî û reyna sîyasetê kurdan meclîse Tirkîya de destpêkerd. Na weçînayiş ra dima, weçînayişanê şaredarîyan de zî BDP xeylek şaredarî girewt.
Serkewtişe kurdan wina dewam kerd, heta serra di henzar pancês de bi partîya newe HDP sîstema berajî ey teqîna û heştay hebî parlamenter qezanc kerd û reyna sîyasetê kurdan bi „zelal“.
Labelê serkewtişe HDP ra tehemûlê dewleta Tirkîya çînîye bî û çahar aşme ra dima yew teşrîna peyêne de newe weçînayiş bî û na weçînatî de zî HDP reyna beraj vîyerna la humara parlamenteranê ey kewtî cêr pancas new hebî vejîya. Ney ra pe zî zulm û zorîya dewlete Tirkîya nêvinert heta ke çend roje cîya ver zî pa di sereke pîya des hebî parlamenterê HDP girewt zere û eştî hepisxane. Nê rewşan ancî sîyaseta kurdan kerdî „lêl“.
Ma sereye nuşte de vatbi kî têkoşinê tarixe kurdan de bade lêlî tim zelalî esta û prosesê sîyasetî zî na mojnane ra. Goreya bawerîya mi vateya verenane ma reyna zî tesdîq bena û bade na lelî ra pe ancî zelalî bena. Labelê ina hew zelalîyê kurdan zaf gird bena.Wext wexto têkoşinê yo, gereka şare kurd zî hêvî û bawerîya xo vîndî nekerî û ver bi faşîzma dewleta Tirkîya îradeya xo bipawî. Nika dore zelalî yo.