Kürdistan de lej gam bi gam xorîn beno. Roj bi roj cenazeyê esker û polîsan yenê. Tenya jû aşma peynî de bi desan eskerî kişiyay. Erdoğan o ke janê-dejê zerrî nêzano doman-qeçikanê şarî rişeno lej û feda keno. Sermiyanê dewlet ê ke domananê xo herb ra dur tepşenê, ser cenazeyanê eskeran siyaset ramenê. Badê her cenaze de AKP îstatîstîkê reyanê xo qontrol kenê. Dîktatorê derg, o ke derbeya sivîl û eskerî vist dewre, rojanê peynî de sûkanê Kurdistan de terorê da gird ramit. Netîceyê fermana ci ya kiştiş de, genc, cenî û domanî fina amey înfaz kerdin.
Zey serranê ‘90’î dew, keye, mergî day ver adir. Cenazeyanê gerîlayan rê îşkence kenê, kenê viran, bi kemend girêdanê, kaş kenê û meydanan de çerxnenê. La nêzanê ke, çiyo ke kaş kenê, wijdanê xo yê qilerîn-leymin û bê-însaniya xo ya. Gever de tîmê teybet yê Erdoğan’î gurekaranê Kurd erdî de derg kerd û bi vatişanê ‘şimadê quwetê tirkan bivînê’ tehdît kerd. Xeylê cayan de xozaya Kurdistan day ver adir û veşnay. Goreyê zonayişan mintiqeya Oremar de eskeranê tirk bombeya ‘Napalm’ ya ke zey sucê merdimîy yena vînayen û qedexe ya şixûlnay. Zilma AKP bi nînan ra sînor niya. Zey 2009’î, reyna-fina operasyonê qirkerdinê siyasî yenê ramiten. Weçîntox û siyasetmedaran ra piya rojane bi desan kes yenê binçimkerdin. Dîktatorê derg o ke omidê xo Kurdan ra birna reyna vano ‘meseleya Kurdan çinya’!
La verra konseptê herb yê dîktatorê derg’î xoverdayişê şarê Kurd zî berz beno. Sûk bi sûk Kurdî xosereya xo beyan kenê. Şarê Kurd endî vano; ma nêwazenê bi hiqûqa kolonyalîst biciwyê û hetê Anqara bîrê îdare kerdin. Cizîr, Sîlopî, Nisebîn, Farqîn, Lîce, Bazîd, Gimgim, Kop, Xîzan, Elîh, Gazî de Kurdan îdareyê xo yê cewherî îlan kerdî. Winî ayseno ke, sûkê bînî zî dê xosereya xo îlan bikerê. Endî Kurdî raya xo Anqara ra abirnenê. Nayî ra dîktatorê derg biyo bom-xînt û har.
Tenya Kurdî nê, verra sîstema dîktator kişta şaranê tirkiye ra zî hêrs û nêrazîbiyenî yenê. Endî şarê tirk zî konseptê lej yê dîktatorê dergî rê nêrazîbiyen damisnenê. Erdoğan û parlamenterê AKP hendî nêşenê bivejyê kuçeyan. Akdoğan Kirikkale de û Müezzinoğlu zî Bursa de hetê şarî amey qewirnayen, hurdiyan ganê xo bi zorî xelesnay. Endî verra dîktatorê dergî, o ke serva-qandê lajanê xo Ahmet Burak û Bilal’î raporê ‘pûç’ û ‘qanser’î girotî sloganê zey ‘kiştox Erdoğan’ benê berz. Manîsa, Bursa, Antalya, Afyon ra zî vatişê; ‘kiştox AKP’, ‘heqê ma şima rê helal nêbo’, ‘hendî beso, herbî vindernê’, ‘Erdoğan lajê xo birişê eskerey’ berz benê. Çi ke endî şarê tirkiye zî fehm keno ke, no herb serva welat nê, semedê îxtidara AKP yeno ramiten. Endî şarî fehm kenê ke mesûlê herbî sermiyanê diz-xirsiz yê AKP yê. Dîktatorê derg bi kiştişê eskeran, bi herbê qilerîn çala mezelê xo kiniteno. Weçînayinanê rewî de pêrokîn şarî îyê dê hesabê Erdoğan û AKP bidê.