Sekreterê Federasyonê Elewî Bektaşî (ABF) Muslum Metînî aşkere kerd ke iyê dê seba ameyoxê domanan û welatî 17ê êlule de meydanan de bibî. Metînî da zanayîş ke 18ê êlule de roja akerdişê mekteban de do vernîya dezgeyê Wezaretê Perwerdeyê Mîllî û vernîya dezgeyê Wezaretê Perwerdeyê Mîllî yê qeza û sûkan de îzehet bîro dayene.
Sekreterê ABF Muslum Metînî verîya mitîngê 17ê Êlule yê Kartalî qisey kerd û malumatanê muhîman da.
Metînî bi vatişanê "Rayîro ke ilmî ra nêvîyareno peynîya ci tarî yo" dest bi qiseykerdişê xo kerd û da zanayîş ke sey Federasyonê Elewî Bektaşî înan seba bi perwerdeyê laîk, ilmî, demokratîk ameyoxa domanan qerarê 17ê êlule de Stenbol de viraştişê mitîngêkî girewt.
Vernîya mekteban de îzehet
Metînî vist vîrî ke dezgeyanê elewîyan ra pîya, KESK, Egîtîm-Sen, HDP, CHP, EMEP, DSP, Halkevlerî, Hereketê Hezîrane, Komela Dêrsimijan, Hereketê Perwerdeyê Laîk û Ilmî, OV-DER, Federasyonê Komeleyanê Kizilirmakî yê Dewe, Komelê Kultur yê Dîvrîgî û xeylê rêxistinê demokratîke yê şêligî zî desteg danê.
Muslum Metînî vist vîrî ke 17ê êlule ra dima zî iyê dê 18ê êlule de Anqara de vernîya Wezaretê Perwerdeyê Mîllî û vernîya Wezaretê Perwerdeyê Mîllî yê qeza û sûkan de, roja ke dibistanî abenê de îzehet bidê çapemenîye.
'Ma do dûştê zaliman de bê'
Metînî aşkere kerd ke mitîngê 17ê êlule do dim, goş û ziwanê kesê ke hîrê meymûnan kay kenê, akero û wina va: "Sey her babete, ma do na babete de zî hetê bindestan de bê. Seba ameyoxa domanan û welatî sey rêxistina elewîyan ma do meydanan de bê. Ma do her tim hetê mazlûman de û dûştê zaliman de bê. Seba ameyoxê welatê xo ma do doş bidê.”
CEBRAÎL ARSLAN /ANQARA - PÎRHA