Wexto ke quwetanê QSD peynîyê serra 2015î de, bendawê Tişrîn xelesn, pey coy heme çimî açarîyayî Minbicî ser. O wext vajîya ke badê Tişrîn hedef Minbic o. La belê rîwalê mudaxale û şantajanê dewleta tirkî hemle herey mend. Peynî de rixmê pêrokîn îtîrazan û şantajanê dewleta tirk, Meclîsa Lejkerî yê Minbic, bi hedefê xelesnayişê Minbicî 1ê Hezîran de kewt hereketî. Tiyaranê lej yê quwetanê koalîsyonê maben netewî zî, hewa ra desteg da hemle. Eynî wext de, quwetanê QSD zî paşt da operasyonî.
Çarçoveyê na hemle de Quwetê Meclîsa Lejkerî yê Minbic 2 hetan ra vera Minbic kewtî ray. Jew cepheyî hetê bendawê Tişrîn û 1 cepheyo bîn zî hetê pirdê Qereqozak ra kewtî hereket. Bi destci kerdişê hemle ra pîya heme çimî açarnîyayî Minbic ser. Çike Minbic cayê stratejîk û wayirê cayê zaf muhîm a.
Nefesê DAIŞ birnîya
Minbic kewna mabenê Kantonanê Kobanê û Efrîn. Eynî wext de, zey boruya nefes ê DAIŞ o. Cok ra zî kurdan ra pîya, çimê heme çoşman açarnîyay Minbic ser. Quwetê Meclîsa Lejkerî yê Minbic 1ê Hezîran de 2 cepheyan ra dest bi hemleya xelesnayişî kerd. Lejkeranê Meclîsa Lejkerî wextê kilmî miyan de derbe ser derbe ra day çeteyanê DAIŞ ro. Hem qolê bendawê Tişrîn û hem zî qolê Qereqozak ra roj bi roj xeylê dewanê newî xelesîyayî û ravey şî. Çeteyê DAIŞ ke derbeyê girdî werdî, bi tifinganê giranî dûrî ra êriş kerdî.
Fermandar Feysel Ebû Leyla
Na serkewtişa Quwetê Meclîsa Lejkerî yê Minbicî de rolê Fermandarê Şems El Şemalê Feysel Ebû Leyla gird bi. 3ê Hezîranî de çeteyanê DAIŞ êrişê dewa Xefîet Ebû Qelqel kerdî. Netîceyê na êrişî de ronayoxanê Meclîsa Lejkerî yê Minbicî ra Fermandarê Feysel Ebû Leyla bi dirbetin. Ebû Leyla ke hewadîya (wedarnîya) Nêweşxaneyê Silêmanîye, rixmê mudaxale û hewldayenanê doxtoran nêxelesîya û weşîya xo kerd vinî. Badê şehadetê Ebû Leyla, Meclîsa Lejkerî nameyê hemle vûrna û kerd ‘Hemleya Şehîd Fermandar Ebû Leyla’. Eynî wext de sozê ca ardişê waşten û xeyalê xelesnayişê Minbicî yê Ebû Leyla ardî ziwan. Embazanê Ebû Leyla a roj ra tepîya, bi qerardarîyeke gird hemle ramitî.
Bi desan dewî xelesnay
Şarê Minbic zî bi kêfweşîyeke gird Quwetê Meclîsa Lejkerî yê Minbicî û embazê Ebû Leyla virar kerdî. Wextê kilmî miyan de bi desan dewê Minbicî û bi hezaran welatijê sivîlî xelesnay. Hemleya Ebû Leyla ra tewr vêşî zî, cenîyê Minbic kêfweş bî. Cenîyan bi govend û tilîlîyan quwetanê xelesnayişî pêşwazî kerdî. Çike DAIŞ tewr jêde zî cenîyan ser o zilm ramite. Bûrka û kincanê sîya ra pîya çeteyan cenîyan keye de kerdî hepis û qanûnê şerîatî ferz kerdî.
Meclîsa Lejkerî yê Minbicî hefteya 2. yê hemle de bîlançoyê herbî aşkere kerd û vist vîrî ke hezar ra vêşî çeteyî ameyê kişten.
Qeyalê fermandarê xo anê ca
Quwetanê operasyonî hefteya ravêrdî de 4 hetan ra çoşmeyê Minbic girotî û resyay şêmigê sûk. Embazanê Ebû Leyla badê 3 hefteyan, xeylê dewê Minbicî çeteyan ra kerdî pak û xelesnay. Hefteyê 4. yê hemle de resay Minbic û embarê genim ke cayê tewr stratejîk ê Minbicî yo xelesnay. Embazanê Ebû Leyla rojê 30. ê hemle de taxa (mehle) Esedîye, ke keyeyê Feysel Ebû Leyla zî mîyan de yo çeteyan ra xelesnay û rihê ey reyna şad kerdî. Nika zî kuçe bi çuke Minbic çeteyan ra kenê pak û xeyalê fermandarê xo yê efsanewî Ebû Leyla anê ca.
MEMED DREWŞ