Serva Domanan Hewldayenê Haştî aşkere kerd ke 5ê Hezîrana 2015î ra na het, 50ê ci netîceyê êrişanê bi bombeyî de, pêropîya 136 domanan pirodayiş û êrişan de weşîya xo kerd vinî. Hewldayenî serva herbî ra seveknayişê domanan serva ronayişê haştî vengê seferberbîyenî da.
Hewldayenî êrişa Dîlok ke netîceyê ci de 32ê ci doman, pêropîya 54 kesan weşîya xo kerd vinî lanet kerd. Hewldayena ke hetê 141 rêxistinan amê ronayen Enqere de Jûbîyayena Mulkîyeyîyan de derheqê babed de kombîyayişê çapemenî viraşt. Ser nameyê Hewldayenî Adnan Vûralî qisey kerd û vist vîrî ke her roj hona vêşî domanî weşîya xo kenê vinî û da zonayen ke tewr peynî de êrişa Dîlok de 33 domanî amey kişten. Vûralî aşkere kerd ke 5ê Hezîrana 2015î ra na het, 50ê ci netîceyê êrişanê bi bombeyî (Enqera, Stenbol, Wan, Xarpêt, Pirsûs, Mêrdîn, Amed, Dîlok) de, pêropîya 136 domanan weşîya xo kerd vinî.
Merdişê domanan her roj jêdîyeno
Adnan Vûralî da zonayen ke nîmeyê serra 2015î ra na het herbo ke yeno ramiten her roj hona jêde domanan kişeno. Vûralî vist vîrî ke badê qetlîama Dîlokî hetê sermîyananê dewlet vatişê ‘bombevano doman’ û pey na argumanî de xo nimitiş çiyekê wehîm û nîno qebûlkerdiş o. Vûralî aşkere kerd ke zey pawitoxê heqanê domanan serva înan homara domanê ke weşîya xo kerdî vinî, jewê ci jêde yo. Çike eke zey ke yeno îdiakerden o ke bombe kirêşna qadî doman o, o kî jew domano ke hetê dewlet nêameyo seveknayiş o. Adnan Vûralî veng da pêrokîn erkdaran ke dûştê êrişê ke sivîlî benê qurban de bikerê hereket. Kombîyayişê çapemenî badê damûsnayişê slaytê derheqê domanan qedîya.
‘Hemverê herbê pîlan haştî’
‘Serva Domanan Hewldayenê Haştî’ Îzmîr de kî derheqê qetlîama Dîlok de bana Komeleya Pirdê Şaran de kombîyayişê çapemenî viraşt. Azaya Hewldayenî Dîlan Taşdemîr zî hayr ant jêdebîyayişê merdişê domanan ser. Taşdemîr kî veng da sermîyananê dewlet ke weşîya domanan seveknê. Îta de kî pîlan ra wazîya ke serva ronayişê haştî bikerê hereket.
Stenbol de kî Azayê ‘Serva Domanan Hewldayenê Haştî’ Meydanê Galatasaray de amey pêhet û kesê ke qetlîam de weşîya xo kerdî vinî vîrardî. Nûmayişa ke panqarta “Serva domanan haştî desinde nika” abîya de azaya Komîsyonê Heqê Domanan yê Şûbeyê ÎHD Evrîm Baykondû qisey kerd. Evrîm Baykondû vist vîrî ke êrişa Dîlok te 33 domanan weşîya xo kerd vinî û aşkere kerd ke ganî serva seveknayişê domanan herkes bikewo hereketî.
Serva haştî seferber bibê
Baykondû da zonayene ke 5ê Hezîrana 2015î ra na het, 48ê ci netîceyê êrişanê bi bombeyî de, pêropîya 134 domanan pirodayiş û êrişan de weşîya xo kerd vinî û wina va: “Nê domanan wexto ke ray ra vêrdî ra, wexto ke vinderdişê otobus de pawiyay, rîwalê xedexeyê vejyayişê teberî, virarda maya xo de, ya kî şewa hene de weşîya xo kerdî vinî.”
Azaya Komîsyonê Heqê Domanan Evrîm Baykondû vist vîrî ke badê qetlîama Dîlok zî sermîyanan qisey û aşkerekerdişanê xo yê verênî dibare kerdê û wina dewam kerd: “Yê ke Dîlok de amey kişten xêlê ci domanî yê. Herzewbîn goreyê îdiayan o ke bombe kirêşna şewa hene domanekê 12-14 serrî yo. Ganî ma seba herbo ke nêşkeme vindarnê manîbikerê fikir bikerê, endî dem resya noqteyekê zaf krîtîk û wehşetî. Ganî ma nayî bivînê.”
Baykondû tewr peynî de veng da sermîyananê hikûmet ke weşîya domanan îstismarê girdan ra seveknê. Baykondû herzewbîn kesanê resayî (kamîl) ra zî waşt ke domanan herbo ke ci ra mesûl nîyê ra bipawê, seba nay bi pêrokîn quwetê xo serva înşakerdişê haştî seferber bikerê, bigurweyê.
ENQERA/STENBOL/ÎZMÎR