Goreyê qerarê Heyetê Wezîrîye yê ke temmuza 2017î de girewtbî, rijnayîşo ke Dabanoglu, Fatîhpaşa, Hasirli, Cevat Yilmaz, Alîpaşa û Lalebeyî de dîyabî destpêkerdiş, dewam keno. Rijnayîş na çarçewa de dewrê Şaredarîya Yenîşehîrî bî.
Çarçewaya qerarê ‘waro rîskin’de taxê Dîcle û Ferît Koşku zî girîyabî mîyanî qerarê îstîmlaqî û no qerar Rojnameyo Fermî de zî weşanîyabî.
Her di taxê ke mîyanê şarî de sey Fîskaya yeno zanayîş de mabênê 10 û 12 hezar merdimî cuyenî. Eke nê her di taxî bêrî rijnayîş, 10-12 hezar merdimî ca û warê xo ra benî. Qasê ke yeno zanayîş her di taxan de pêro pîya hezar û 40 awanîyî estî.
Xebatêka ilmî û jeolojîke nêameye kerdiş
Goreyê ûsulî, seba îlankerdişê waro rîskin ganî verê cû cigêrayîşêk bêro kerdiş. No cigêrayîş de ganî raporê muhendîsanê înşaatî û yê jeolojîyî bibo. Labelê îstîmlaqkerdişê Fîskaya de heta nika ti xebate nêameyo kerdiş. Tena persê ‘ruhsatê awanîyan esto, an çin o?’ û ‘erjê na awanî çiqas o?’ameyî kerdiş. Tena nînan ser ro Wezîrîya Dorme û Bajarvanî derheqê her di taxan de qerarê îstîmlaqkerdişî girewto.
Kesê ke Fîskaya de cuyenî, yê ke serranê 90î de dewê înan ameyî veşnayîş û zext û tedayan ver remayî yî. Şarê tîya debara xo bi heywan û zîretî keno. Zafaneyê şarî sebze û meyweyê ke Bexçeyanê Hevselî de resnenî, roşenî û bi no hawa debara xo kenî.
Heto bîn ra herçiqas ke taxê Dîcle û Ferît Koşku mîyanê sînorê UNESCO de ca gênî, labelê reyna zî ‘waro rîskin’ ame îlankerdiş.
ESRA SOLÎN DAL /MA/AMED