Tarîyo zulmet bi. Roşnayêk çin bi. Yew hewî zî çin bi. Wextê bêhewî bi. Hewceyî yew çila bi. Tarîyo zulmet tewr zaf ser serê Kurdistanê de bi. Tarîya zulmet ra yew roşnê hewce kerdênê.
Kurdistan bêveng bi. Zîndanan de bêvengî bibî. Vengêk hewce kerdênê. Verê cû zîndana Amedî ra veng vejîya. Ewwîlî Mazlum Dogan. Dima ra çaran. Ferhat Kurtay, Mahmut Zengîn, Eşref Anyik û Necmî Oner xo kerd adir. Roşnê da Kurdistanê.
Dima ra çalakîya gird ya Rojîyê Merdişî. Çalakiya 14 Temmuze. Xeyrî Durmuş, Kemal Pîr, Akîf Yilmaz û Alî Çîçek paşda yewbînî. Bi wesli wesli helîyayî. Goşt helîya. Cîger helîya. Mezg helîya. Velgî helîyayî. Demar de gonî ziwa bî. Tena bi astî û çermî mendî. Yew bi yew vateyê xo vatî. Kemal Pîr: “Do na hereket, şarê kurdî biresno Azadî. Ez na hereket de serkewtiş vînena.” Xeyrî Durmuş: “Mezelê mi de denydar şi binusnê.“ Alî Çîçek bi Stêrka Sûr yê Kurdistanî.
Înan bi Çalakîya 14 Temmuze şert û merce en zehmet de serkewtiş senî beno, nîşanê pêronê dinya da. Înan şert û merce en zehmet de dewleta tirk bin vist. Înan rayîra xoverdayîş nîşane gerîlaye PKK da. Înan ruh û cesaret da şarê kurdî. Pê ruh û cesaret înan gerîla 15 Tebaxî de şer dadestpêkerdiş. Xoverdayîş înan bi xeta xoverdayîş yê PKK û şarê kurdî. Sey baw û kalane ma vato, “Zehmet ke çine bo, qimetî kî çino.” Înan mane nê qiseyî ard ca. Îspat kerd kî, Kurdistanê de bêxoverdayîş, serkewtiş nêbeno.
Înan da nîşandayîş ke en şert û merce xirab de zî yew eşkeno zaliman binvisno û serbikewro. Sey qiseyê erjayî yê verênan ma, “Weş bo wa pê hewt koye de bo” hina rayîra azadî ya têkoşîna dem dergî nîşanê ma da. Înan reyna raştîya qiseyê bîn yê verênan ma, “Camerd yew rey mireno, tersonek her roj mireno.” nîşanê dinya û alem da. Kemal Pîr vat ke, “Ez cuyayîş ra hina heskena ke, ez oxurê ey de mirena.”
Ewro ciwanê kurd yê ke têkoşîn kenî, pêronê înan rayîra Kemal Pîr taqîp kenî. Ewro zî dewleta tirk hêrîşê çar parçe Kurdistanê kena. Şert û merce ewro zî sey Zîndanê Amedî yê. Neyar bajaran xirab keno. Kurdistan kerdo sey Zîndanê Amedî yê demê 1980. Xeyrî Durmuş û Kemal Pîr înan senî şert û merce en xirabî de serkewtî.Nika zî şarê kurdî xoverdayîşêk gird bikero, Kurdistan beno welatêk azad.
Xora zobî zî nêbeno.