Averşîyayîşê peyênî û bêusûlîyê ke Erebîstano Siudî de benî, reyna îzehetê ‘ma fek Vehhabîtîye ra verada’ û vatişê bînî nîşan danî ke herême de bedilîyayîşan ser o munaqeşeyî benî.
Herême de tewr zaf qala ‘Îslam de ronesans viraştiş’ yeno kerdiş û seke yeno zanayîş no vatiş reya sifteyîne hetê Rayberê Şarê Kurd Abdullah Ocalanî ra amebî vatiş. Ocalanî kitabê xo yo bi nameyê ‘Bi Hawayo Şorişgêrî Nizdbîyayîşê Dînî’ de bawerî sey afyonî girewtbî dest û dima ra prosesê Îmrali ra dima zî bi pawitişnameyanê xo de qala reform û ronesansê dînî kerdbî.
Ocalanî vatbî ‘Lazimîya dezgehanê Şaristanîya Demokratîke bi ronesans, reform û şorişê roşnbîyayîşî esta’ û wina dewam kerdbî: “Nê hîrê esasî kulturê Rojhelato Mîyanênî de nêameyî cuyayîş. Bitaybetî ganî prosesê reformî Erebîstan de dest pêbikero. Eke vejîyayîşê Îsraîlî, nîjadperestîya ereban bihêz kerdo, êdî do eksê ci de tesîr bikero. Heme dinya fam kerdo ke pêrodayîşê ereb û Îsraîlî wina çareser nêbeno. Ancax bi rayberîyanê demokratîkan vernîya ci abeno.”
‘Gelo şênî fek qesranê xo ra verabidî’
Ocalanî pêvînayîşê mabênê serranê 2013 û 2016î de ardbî ziwan û waştêne ke wa babete bêro munaqeşekerdiş. Dima ra Kongreya Îslamo Demokratîk (DÎK) awan bîbî û na babete ser o munaqeşe kerdbî. Labelê vatişê ‘dîn de reform’ hetê çapemenîya hetgire ra bîybî haletê propogandaye. Ocalanî heta tecrîdî zî parekerdişê fikranê xo domna.
Nuştoxe Hamîde Yîgîta ke herême nizdî ra taqîp kena, babete ser o wina va: “Meseleya reformî ke Erebîstan de ameye vatiş, muhîm a, labelê wina aseno ke Erebîstan nêşêno bikero.”
Verfekê HDPyî Ayhan Bîlgen zî muhîmî dano rojevebîyayîşê na babete. Bîlgenî wina va: “Eke no bibo o wext do şarî bişênbî têhet de bi hawayo pîya bicuyî. Labelê gelo Erebîstan şêno an nêşêno, nêzana. Gelo şênî fek qesranê xo ra verabidî û hesab bidî. Nîşaneyî nêyî çin î.”
NAVENDÊ XEBERAN