Dewleta tirke awanbîyayîşê komare ra dima bi polîtîkayanê xo yê înkar, îmha û zilmî kurdan bêveng kerdibî. Kurdê ke serranê 1920-30an de vera nê polîtîkayan de serewedartî, raştê îmhayêka pîle ameyî. Bi no qeyde çerxê asîmîlasyon û polîtîkaya tirkkerdişî erzîya dewre. Vera nê kerdenan de demêko derg gamêk nêameye eştiş. Bi serran şaristan û qezayanê kurdan de tu kes nêeşka nameyê kurd û Kurdistanî bîyaro ziwan… Kurdistanêko çar perçe û binê zilmî de mendibi kurdan ro. Çerxa zilmî wina dewam kerd û kolonyalîstî Kurdistan esîr girewtî. Vera nê kerdenan de lazimî hemleyêka pîle rê estibî. Û na hemle qelbê Kurdistanî de, Botan de dîyaye destpêkerdiş. Ruho ke Kurdistan newe ra eşt zerrîya kurdan, o wext xo nîşan da û hîşyarîyêka pîle nîşanê heme kolonyalîstan da. Îşgal, înkar, îmha, zilm, asîmîlasyon… Nê heme çîyî bi na hemle şikîyayî… O ruh, ruhê 15ê Tebaxe yo. Ruho ke înkar nê erdan ser de şikit û sîstemo zilmkar eşt mîyanê tersêka pîle.
Partîya Karkeranê Kurdistan-PKK, serra 1978 de nê erdan ser de yanî Rojhelato Mîyanên de cayo en qedîm o nê erdan de yanî Kurdistan de xo îlan kerd… Destpêk de dewleta kolonyalîst û înkarker PKK sey partî û komelanê bînan dîye. La dima ra fam kerd ke PKK sey partîyanê bînan nîya û estbîyayîşê aye xelasî û serfirazîya kurdan o. Semedo ke kurdî bi rayverîya PKKî nêwerzî payan ser derbeya 12ê Êlûle ameye viraştiş. Û leşkerî dest nayî îdareyê dewlete ser de. Bi no qeyde waştî ke Bakurê Kurdistanî de kurdî PKK nêşinasnî… Kurdistan de kadroyê PKKî û kesê ke xebatanê partîye kerdêne bi na derbe esîr ameyî girewtiş. Û xoverrodayîşo ewilin o PKK vera na derbe û înkarê dewleta kolonyalîst de zindanan de dest pêkerd. Serra 1982î de têkoşîno ke nika bi îrade û bawerîyêka pîle dewam keno xo nîşanê dewleta faşîst û heme dinya da… Têkoşîno ke zindanê Amedî de bi îradeyêko pîl hetê kadroyanê PKKî Mazlum Dogan, Kemal Pîr, M. Hayrî Durmuş, Alî Çîçek û Akîf Yilmazî radîya destpêkerdiş serra 15ê Tebaxa 1984î de şexsê Fermandar Egîdî de şeklêko newe girewt.
PKK semedo ke xo mîyanê kurdan de bido şinasnayîş û nameyê kurd û Kurdistanî ke ameybî înkarkerdiş nîşanê heme dinya bido hedrekarîya 15ê tebaxe kerd. Çunkî hînî wextê têkoşîno sîlehin amebî. Yan Kurdistan de şer yan zî çînbîyayîş… Wextêko winasî ke dişmen çînbîyayîşê to ser o planan keno. Wextêko winasî ke dişmen her çîyê xo de biîdîa yo. Wextêko winasî ke mîyanê şarî de hêvî bîya kêmî. Ê wextan de na hemle ameye plankerdiş. Û a roje de yanî roja 15ê Tebaxe de hemle dest pêkerde. Bi fermandarîya fermandar Egîd-Mahsûm Korkmazî, gerîlayê PKKî qezaya Sêrt Dihê de fîşeka ewiline teqnayî. Eynî roje de qezaya Şemzînanî ya Colemêrgî û gelek cayanê bînan de fîşekî teqîyayî û roja newe ra wariştişî îlan bîye. Hemleya 15ê Tebaxe vera înkar, îmha, zilm, asîmîlasyon û gelek çîyanê bînan de dest pêkerd. Ruho ke bi hemleya 15ê Tebaxe vejîya orte sere de Bakurê Kurdistan dima ra zî heme perçeyanê Kurdistanî de tesîrêko pîl kerd. Dişmenan zî eşt mîyanê tersêka pîle. Kurdî bi na hemle bi rayverê PKKî dest bi têkoşînêko neteweyî kerdî. Çunkî 15ê Tebaxe hetêk de zî ruhê neteweyî ke Kurdistan de her tim amebi pelexnayîş, newe ra warezna pay ser. 15ê Tebaxe cewabêko pîl da derbekaran. Derbekarî Kurdistan de teda resnaybî sewîyeyêka berze la 15ê Tebaxe na teda şikit û înan mîyanê tarîyîye de verda. Û semedê kurdan bîye roşnîyêk. Na hemle şexsê fermandaro pîl Egîd de Kurdistan de rîpelêko newe akerd û dest bi nuştişê romanêk kerd. Senî ke Rayberê Şarê Kurd Abdullah Ocalan vano ‘PKK romano ke hema peynîya ci nêameyo yo.’ Fermandar Egîd bi hemleya 15ê Tebaxe cumleya ewilin a nê romanî nuşt. Hemleya 15ê Tebaxe 33 serran peyê xo de verda û kewte serra 34in. Her 15ê Tebaxa newe de PKK xo hêna zêde kerde pîle û çar perçeyê Kurdistanî de nameyê xo resna heme dewe, qeza, şaristan û gelek cayan ro.
Ewro 33 serrî yo ke bi îradeyo ke na hemle vete orte têkoşînê neteweyî yê kurdan dewam keno. Mîyanê 33 serran de bi hîrabîyayîşê cayê şerî û serkewtişan PKK hêna zêde bî hêzin. Bi no hêz nika îradeyo ke 33 serrî verê cû fermandar Egîd vera înkar û îmha de nîşan da çar perçeyê Kurdistanî de bi serkewtişanê pîlan hêza zêde beno pîl û hêz dano şarê kurd. Şexsê fermandar Egîdî de gerîlayê PKKî xo resnayî profesyonelî û nika bîyî wayîrê artêşa azadîye ya pîle. Fîşeka ke fermandar Egîdî teqna, nika her cayê Kurdistanî de vera dişmenî de yena teqnayîş û tersa dişmenî hêna bena xorîn. Waştiş û hêvîya seserran ke bi o îrade û ruho ke 15ê Tebaxa 1984î de gonîyê xo kerdibî newe ewro hêdî-hêdî yenî ca. Çunkî serkewtişê ke moralê xo 15ê Tebaxe ra gênî her roje zêdîyenî. Kurdî ke çîn ameynê hesibnayîş nika fekê heme dinya de yî. Nika bê kurdan nê erdan ser de tu qerar nêno girewtiş, no zî girêdayîyê hemleya 15ê Tebaxe yo.
Alaya ke 15ê Tebaxe de ameybî berzkerdiş nika Bakur, Rojawan û Şengal de bîya berze û hetê heme dinya ra yena vînayîş. Bakur de şarê kurd bi hemleya xorayberdişî ruhê 15ê Tebaxe vet orte. Şorişê Rojawanî ruhê 15ê Tebaxe ser o dest pêkerd. Şengal de zî ruhê 15ê Tebaxe kurdanê êzidîyan destê çeteyanê wehşîyan ra xelesna û nika sîstemêk awan keno. 33 serrî verê cû yê ke nê koyan ser de dest bi têkoşîno sîlehin kerdibî ewro Kurdistan, Tirkîya û Rojhelato Mîyanên de destan nusenî. Hemleya 15ê Tebaxe şexsê fermandar Egîdî de xo kerda ruhê azadîye. No ruh ewro pêrûnê Kurdistanî esîr girewto û sey varanê aşma nîsane kurdan ser ro vareno; varano ke vareno kurdan resneno yewîye û hem Rayberê Şarê Kurd Abdullah Ocalan hem zî Kurdistan ver bi azadîye beno.
MERKEZÊ XEBERAN