Erdlerzê Marmara ke 17ê Tebaxa 1999î de qewimîyabî, netîceyê ci de goreyê hûmara fermî 17 hezar 480 kesî merdbîy, 23 hezar 781 kesî birîndar bîybî, 505 kesî seqet mendbîy. Labelê goreyê hûmara nêfermî yeno vatiş ke 50 hezarî ra zêdeyêr kesî merdîy û se hezar kesî ra zêdeyêr kesî zî birîndar bîybî.
Ewro Serrgêra 18. ya Erdlerzê Marmara yo. Babete ser o Endamê Şûbeya Stenbolî ya Odeyê Muhendîsê Jeofîzîkî yê TMMOBî Savaş Karabulutî qisey kerd.
Karabulutî va ‘Tirkîya welatê erdlerzî ya û bedilîyayîşê bajarî çareserî nêano’ û wina dewam kerd: “Problem tena bi tespîtkerdiş çareser nêbeno, ganî çareyê somutî bêrî dîyayîş. Tirkîya bi girdkerdişê ekîbê raxelisnayîşî hewl dano çareser bikera, labelê wina nêbeno. Welatanê averşîyayeyan de tedbîrî yenî girewtiş. Ma hîrê serrî yo ke waştişname danî Walîtîya Stenbolî, labelê walîtî nê, selahîyetdarê AFADî ma gêrenî û vanî ‘ma do malumat bidî şima’. Persê ke ma kenî bi mehneya ‘nimiteyî esta’ cewab nêdanî.”
Îdarekarî amade nîyî
Karabulutî wina domna: “Verê cû cayê kombîyayîşî 350 hebî bîy, la îdarekaran nika kerdo 70 hebî. Zafaneyê nê cayan zî aydê şexsan o û xebera wayîran zî çin o ke ersayê înan bîyî cayê kombîyayîşî. 1999 de şar parkan de cuyayênê. Labelê nika bajar de parke daxî çin a. Nika cayê mezelan daxî çin o. Ma ver bi tepîya şonî. Stenbol seba erdlerzî amade nîyo.”
DÎHABER/STENBOL