ZEYNEP KURAY / ANF / ANQARA
19ê Kanûna 2000î de bi nameyê ‘Agêrayîşê Cuye’ 20 zîndanan de operasyonî ameybî viraştiş û netîceyê operasyonan de 30 hepsîyê sîyasî merdbî û bi seyan hepsîyî zî birîndar bîybî. Herçiqas ke o wext tayê îftîrayan eştî hepsîyan ser de, labelê dima ra belge û îtîrafê ke vejîyayî, nîşan dayî ke operasyonî seba qetlîyamî ameybî viraştiş.
Sosyolog Velî Saçiliko ke karê xo ra ameyo îxraçkerdiş û 406 rojî yo ke Caddeyê Yukselî de xover dano zî hem şahid û hem zî mexdurê ê wextî yo. Babete ser o Saçilikî dîyar kerd ke qetlîyamê 19ê Kanûne game bi game erzîya dewre û wina va: “O wext koalîsyonê MHP-ANAP-DSP hukmat de bî û no hukmat tepişîyayîşê Abdullah Ocalanî ra dima vatêne qey tevgerê kurdî qedîyayo û êdî dore ameya sosyalîstan. Cok ra hukmatî bitaybetî zîndananê Burdur û Ulucanlarî de amadekarîya qetlîyamî kerdêne.”
Saçilikî dewamê qiseykerdişê xo de wina va: “O wext tayê çeteyî erzîyayî dewre û zîndanan de pêrodayîşê sîlehinî bîyênê. Bitaybetî zîndanê Ulucanlarî de çend kesî ameyî kiştiş. Reyna cendirmeyan hêrişê keyeyê ma kerdênê û dest ronayênê kel-melanê ma ser de. Ma koguşê 30 kesan de 120 kesî mendênê. O wext embazan waşt wa koguşo 7. bêro akerdiş. Labelê cewabê dewlete qetilkerdişê 10 hepsîyê sîyasî bî. Badê ke ez surgunê Zîndanê Burdurî bîya, hêrişê zîndanan kerdî û netîce de 10 hepsîyî ameyî qetilkerdiş. O wext pêro pîya 122 şorişgêrî merdî. Ewro zî ti ferqê zîndanan çin o. No het de 19ê Kanûne ewro zî dewam keno.”