Merkezê HPGyî îzehetêk da û îzehetê xo de derheqê bîlançoya şerê 2 serran de malumatê muhîmî pare kerd. HPGyî bîlançoya şerê mabênê 24ê Temmuza 2015 û 24ê Temmuza 2017î de zanayîşê hîra da.

Goreyê malumato ke hetê HPGyî ra ame dayîş, teferruatê şerê 2 serran ameyo vatiş. Goreyê nê malumatî mîyanê 2 serran de 72ê rutbeyin pêro pîya 6353 leşkerê tirkî merdî û 1116 gerîlayî zî şehîd kewtî.  

Îzehetê HPGyî de bale ancîyayo prosesê sîyasî ser û wina ameyo vatiş: “Prosesê aştî ke Rayberê Apoyî 2013 de bi deklarasyonêko tarîxî dabî destpêkerdiş, serra 2015î de bi mutabakatê Dolmabahçe resaybî dûştêko muhîm. Her çiqas ke prosesêko winasî orte de estbî zî AKPyî mîyanê 2 serran de tim provokasyonan esas girewtêne û waştêne prosesî sabote bikero. Erdogan tewr peynî MHP reyde îtîfaqêk viraşt û 24ê Temmuza 2015î de vera tevgerê ma de şer da destpêkerdiş. Îttîfaqê AKP û MHPyî tecrîd û îzolasyonê ke Rayber Apoyî ser de meşnayî, nîşan dayî ke vera kurdan de senî fikirîyenî.”


Hedefê dewlete qirika ci de mendî

HPGyî îzehetê xo de bale anto Planê Têkberdişî ser û wina dewam kerdo: “Îttîfaqê AKP û MHPyî seba ke tevgerê ma tasfîye bikero, Rayberîya ma bêtesîr verado planêko hîra amade kerdo. Labelê hêrişê nê îttîfaqî raştê xoverdayîşê şar û gerîlayanê ma ameyo. Sere de şarê ma yê Sûr, Cizîr, Hezex, Nisêbîn, Şirnex, Gever û sewbîna zaf cayan de Xoserîya Demokratîke îlan kerd û hêzê YPSyî nê cayan de destanî nuştî. Nê xoverdayîşan de ruhê fedayî yê Apoger yewna rey vejîya orte û hedefê dewleta dagîrkerî qirika ci de ameyî verdayîş.” 


Bîlançoya şerê 2 serran 

HPGyî îzehetê xo de teferruatê netîceyê şerê 2 serran zî dîyar kerdo û îzehet wina peynî bîyo: “Mîyanê 2 serran de 746 operasyonê bejayî ameyî viraştiş. 1246 hêrişê teyara û helîkopteran bîyî. 2338 reyan bi hawan, obus, tanq û topî hêrişî ameyî kerdiş. 333 reyan mabênê gerîla û hêzê dewlete de pêrodayîşî vejîyayî. Pêro pîya 2239 reyan gerîlayan çalakî viraştî. 559 çalakîyî netîceyê înan nêame zelalkerdiş. Netîceyê şerî de 72ê ci rutbeyinî pêro pîya 6353 polîs û asker ameyî kiştiş û 2261 kesî zî birîndar bîyî. Nê çalakîyan de 376 wesayîtê leşkerî ameyî îmhakerdiş. 209 wesayîtê leşkerî ameyî derbkerdiş. 5ê helîkopterê skorsky, 5 kobrayî û 1 teyaraya F-16 ginîyayî waro. 85 helîkopterî zî ameyî derbkerdiş. Netîceyê şerê 2 serran de 1116 gerîlayî zî resayî şehadet û 30 gerîlayî zî esîr kewtî destê dişmenî.” 


BEHDÎNAN