Heta nika bi seyan kurdî hetê rejîmê Îranî ra ameyî îdam kerdene. Bitaybetî kurdê ke nasnameyê xo yê kurdîtîye pawenî, îdam bîyî/benî. Nika cezaya îdamî dîyaya xeylê hepsîyan û beno ke nê hepsîyî zî bêrî îdam kerdene. Nê hepsîyan ra yewe zî Ramîn Huseyîn Penahî yo.
Penahî 23ê Hezîrana 2017î de netîceyê hêrişêkî de bi hawayo birîndar amebî tepiştene. Penahî hêriş ra bi hawayo birîndar xelisîyabi, labelê embazê ci Behzad Nurî, Hamed Seyf Penahî û Sabah Huseyîn Penahî zî ameybî înfaz kerdene. Penahî bi îdîaya endamê rêxistine bîyayene ra cezaya îdamî dîyaybî ci û aşma nîsane de cezaya ci ameybî tesdîq kerdene. Labelê dima ra seba ke reaksîyonî zêde bibî, cezaya ci ameybî taloq kerdene.
Ame musayîş ke gardîyanê Zîndanê Sîne seba ke Penahîyî îdam bikerî, hêrişê hepsîyan kerdî. Labelê hepsîyî xover dayî. Netîceyê hêrişî de 20 hepsîyî birîndar bîyî. Mîyanê nê hepsîyan de Penahî û embazê ci Haydar Qurbanî zî estî.
Goreyê radyoya Zamanehî pêrodayîşî heta 17ê Hezîrane dewam kerdî û zîndan de hîna zî no het de têgêrayîşî estî. Seke yeno zanayîş çend hewte verê avûkatê Penahîyî ra amebî vatene ke Mehkemeya Berze newe ra ewnîyayîşê doza Penahîyî red kerda û keyeyê Penahîyî ra zî ameyo vatiş ke aşma Remezanî ra dima do bêro îdam kerdene.
ANF/SÎNE